खोटाङ — प्रभुराम राई पुरुष फुटबल प्रतियोगिताको उपाधि नेर्पा स्पोर्ट्स क्लबले जितेको छ । बुइपास्थित यलम्बर रङ्गशालामा आइतबार सम्पन्न फाइनल खेलमा गछिया युवा समाज मोरङलाई पेनाल्टी सुटआउटमा पराजित गर्दै नेर्पाले उपाधि चुमेको हो ।

विजेता नेर्पा स्पोर्ट्सले तीन लाख नगद, ट्रफी, मेडल र प्रमाणपत्र पाएको छ । उपविजेता गछियाले एक लाख ५१ हजार नगदसहित ट्रफी, मेडल र प्रमाणपत्र हात पारेको छ ।

सेमिफाइनलिस्ट बुइपा ११ स्पोर्ट्स क्लब र खाराम्बु स्पोर्ट्स क्लबले ५०–५० हजार नगद पाएको म्याच कमिस्नर तथा जिल्ला फुटबल संघ खोटाङका प्रवक्ता सनम राईले बताए ।

विधागत पुरस्कारअन्तर्गत उत्कृष्ट खेलाडी नेर्पा स्पोर्ट्स क्लबका शलीन ढकाल घोषित भएका छन् । उनले नगद ३० हजारसहित मेडल र प्रमाणपत्र पाएका छन् ।