काठमाडौँ — ब्याटिङमा केही सुधार गरे पनि नेपाल महिला ट्वान्टी–२० विश्वकप छनोटको दोस्रो अभ्यास खेलमा अमेरिकासँग ६ विकेटले पराजित भएको छ । नेपालको अभ्यास खेलमा लगातार दोस्रो हार हो ।

टस हारेपछि ब्याटिङ निम्तो पाएको नेपालले कीर्तिपुरस्थित त्रिवि अन्तर्राष्ट्रिय क्रिकेट मैदानमा निर्धारित २० ओभरमा ९ विकेट गुमाई १ सय ३६ रन बनाएको थियो । ओपनर चेतना रेड्डीले अर्धशतक बनाएपछि जवाफमा आएको अमेरिकाले ५ बलअघि लक्ष्य पूरा गर्‍यो ।

आयरल्यान्डसँगको पहिलो अभ्यास खेलमा १ सय रनमात्र बनाउन सकेपछि नेपालले बुधबार ९९ रनको हार बेहोरेको थियो । तर शुक्रबार नेपालको माथिल्लोक्रमले निकै सुधारिएको ब्याटिङ गरेको थियो । सम्झना खड्का र विन्दु रावलले नेपालले निकै राम्रो सुरुआत दिलाए । यी दुईले ६ ओभरभित्र ४२ रन जोडेका थिए । आफ्नै कलमा १ रन लिन खोज्दा निकै साँघुरो स्थितिमा रनआउट भएकी सम्झनाले २० बल खेल्दै ३ चौकासहित २४ रन बनाइन् । उनी ३ रनमै क्याचआउट हुनबाट जोगिएकी थिइन् । उपकप्तान पूजा महतोले १५ बल खेल्दै २ चौकासहित १७ रन बनाइन् ।

कप्तान इन्दु बर्मा १ चौकासहित ५ बलमा ४ रन बनाइन् । विन्दु पनि २७ रनमा रनआउट भइन् । उनले २८ बल खेल्दै ३ चौका प्रहार गरिन् । कविता कुँवर ३ र रुबिना क्षेत्री ५ रनमा आउट भए । कविता जोशी र रोमा थापाले मध्यक्रममा राम्रो ब्याटिङ गर्दै नेपाललाई राम्रो स्थितिमा उभ्याएका थिए । कविताले १४ बलमा ४ चौकासहित २० र रोमाले १४ बलमा समान १ चौका र छक्कासहित १९ रन बनाए । सीता रानामगरले १ रनमात्र बनाउन सकिन् । राजमती ऐरी ७ बल खेल्दै १ चौकासहित ८ र मनीषा उपाध्याय १ रनमा अविजित रहे ।