काठमाडौँ — नेपालले महिला ट्वान्टी–२० विश्वकप छनोटको अभ्यास खेलमा अमेरिकालाई १ सय ३७ रनको लक्ष्य दिएको छ। टस हारेपछि ब्याटिङको निम्तो पाएको नेपालले त्रिवि क्रिकेट अन्तर्राष्ट्रिय मैदानमा निर्धारित २० ओभरमा ९ विकेट गुमाई १ सय ३६ रन बनाएको हो।

आयरल्यान्डसँगको पहिलो अभ्यास खेलमा बुधबार १ सय रन मात्र बनाउन सकेपछि नेपालले ९९ रनको हार बेहोरेको थियो। तर शुक्रबारको खेलमा नेपालको माथिल्लो क्रमले निकै सुधारिएको ब्याटिङ गरेको थियो।

सम्झना खड्का र विन्दु रावलले नेपाललाई निकै राम्रो सुरुआत दिलाएका थिए। यी दुईले ६ ओभरभित्र ४२ रन जोडेका थिए। आफ्नै कलमा निकै साँघुरो १ रन लिन खोज्दा रनआउट भएकी सम्झनाले २० बल खेली ३ चौकासहित २४ रन बनाइन्। उपकप्तान पूजा महतोले १५ बल खेली २ चौकासहित १७ रन बनाइन्।

कप्तान इन्दु बर्माले १ चौका प्रहार गरी ५ बलमा ४ रन बनाइन्। विन्दु पनि २७ रनमा रनआउट भइन्। उनले २८ बल खेल्दै ३ चौका प्रहार गरिन्। कविता कुँवर ३ रनमा आउट भइन् भने रुविना क्षेत्री ५ रनमा आउट भइन्। कविता जोशी र रोमा थापाले मध्यक्रममा राम्रो ब्याटिङ गर्दै नेपाललाई राम्रो स्थितिमा उभ्याए।