पोखरामा भौतिक पूर्वाधार पर्याप्त रहेको तर त्यसलाई सुहाउँदो प्रतियोगिता नभएको गुनासो
What you should know
पोखरा — पोखरा– ‘द स्टेज इज रेडी’ । एनएसजेएफ पल्सर स्पोर्ट्स अवार्ड नेपाली खेलकुदकै सबैभन्दा ठूलो र प्रतिष्ठित मानिएको अवार्ड बुधबार नयाँ अध्यायमा प्रवेश गर्दै छ । अवार्डका अहिलेसम्म जति पनि संस्करण भए, ती काठमाडौंमै मात्र भए । यसपल्ट २२ औं संस्करण पोखरामा हुँदै छ, त्यहाँको सभागृहमा ।
आयोजक नेपाल खेलकुद पत्रकार मञ्च (एनएसजेएफ) ले पनि भनेको छ, तयारी जति सबै पूरा भइसकेका छन् । त्यसकै पूर्वसन्ध्या अवार्ड कार्यक्रममा मीठो साथ पनि पायो, ट्वान्टी–२० विश्वकपको ट्रफीको । यो धेरै हदसम्म अप्रत्याशित थियो, तर यसले कार्यक्रममा धेरै उत्साह भने थपेको छ ।
अवार्ड कार्यक्रमको अघिल्लो दिन मंगलबार आयोजित स्पोटर््स समिटमा ट्रफी प्रदर्शन गरिएको थियो । भारत र श्रीलंकामा फेब्रुअरीतिर अबको ट्वान्टी–२० विश्वकप आयोजना हुनेछ र त्यसैक्रममा ट्रफी नेपाल आइपुगेको हो । ट्रफी मंगलबार मात्रै पोखरा आइपुगेको हो र त्यसलाई स्पोटर््स समिटमा प्रदर्शन गर्ने शौभाग्य जुरेको हो ।
त्यसै क्रममा मञ्चका अध्यक्ष निरञ्जन अधिकारीले कार्यक्रमलाई लिएर आफू धेरै उत्साहित रहेको बताएका छन् । उनले भनेका छन्, ‘कार्यक्रमलाई लिएर चाहिने सबै तयारी पूरा भएको छ । अब हामी अवार्ड कार्यक्रमकै व्यग्र प्रतीक्षामा छौं । हामीलाई सुरुमा मोफसलमा अवार्ड कार्यक्रमको आयोजना गर्दा धेरै
चुनौती सामना गर्नुपर्ने लागेको थियो । तर पोखरामा आएपछि हामीले चुनौतीभन्दा पनि बढी अवसर देखेका छौं । मलाई लाग्छ, अब पोखरा राष्ट्रिय र अन्तर्राष्ट्रिय अवार्ड कार्यक्रमको पनि गन्तव्य बन्नेछ ।’
त्यस्तै मञ्चको एनएसजेएफ गण्डकीका अध्यक्ष एमबी आस्था मगरले अवार्ड कार्यक्रमको आयोजनाले पोखरेली खेल इतिहासमा नयाँ अध्याय थपिएको बताए । उनले भने, ‘पोखरा सहर स्पोटर््स हबको रूपमा स्थापित हुँदै आएको छ । अब स्पोर्ट्स अवार्डको सफल आयोजनाले पोखराको खेल क्षेत्र अझ विस्तृत र फराकिलो भएको छ ।’ अवार्डमा पोखरा महानगरपालिका प्रवर्धक रहेको छ । अवार्डको मुख्य प्रायोजकमा गोल्छा ग्रुपको निरन्तरता कायमै छ, यस्तै पावर्ड बाईमा यती एयरलाइन्सको साथ थपिएको छ ।
स्पोर्ट्स अवार्डको भोटिङ पार्टनरमा खल्ती र पोसाक पार्टनरमा केल्मी नेपाल रहेका छन् । अवार्डमा यसपल्ट पनि १० विधामा अवार्ड प्रदान गरिनेछ । त्यसमा वर्ष खेलाडी पुरुष, वर्ष खेलाडी महिला, युवा वर्ष खेलाडी, वर्ष प्रशिक्षक, पिपल्स च्वाइस अवार्ड, पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड, टिम अफ द इयर र एसियन स्पोटर््स जर्नालिस्ट अवार्ड रहेका छन् । पिपल्स च्वाइस अवार्डको मनोनयनमा रहेका खेलाडीमा उसुका विजय सिन्जाली, टेबल टेनिसकी इभाना थापा, भलिबलका हिमाल सुनारी, क्रिकेटकी पूजा महतो र फुटबलकी रेखा पौडेल रहेका छन् ।
पोखरा हो, नेपालको ‘स्पोर्ट्स हब’
पोखराको म्याजेस्टिक होटलमा आयोजना गरिएको समिटको अवसरमा प्यानल डिसकन गरिएको थियो र विषय रहेको थियो, पोखरामा खेल पयर्टन र अर्थतन्त्र । पोखरेली पत्रकार दीपेन्द्र श्रेष्ठले संचालन गरेको त्यस कार्यक्रमको निचोड थियो, पोखरा निर्विवाद रूपमा ‘स्पोर्ट्स हब’ हो ।
पोखरामा खेलकुदको विकास र विस्तारको सम्भावना उत्तिकै धेरै छ । तर चुनौती पनि उत्तिकै धेरै मात्र छैनन्, काम गर्न पनि त्यत्तिकै बाँकी छ ।
कार्यक्रममा विशेषज्ञका रूपमा सहभागी हुनेमा नेपाल पयर्टन बोर्डका अफिसेटिङ डाइरेक्टर सुनिल शर्मा, राष्ट्रिय खेलकुद परिषदका पूर्वसदस्य सचिव टंकलाल घिसिङ, पोखरा टुरिजम बोर्डका संस्थापक अध्यक्ष अशोक पालिखे र पोखरा भ्रमण वर्षका संयोजक गोपी भट्टराई रहेका थिए ।
त्यस क्रममा शर्माले पोखरामा खेलकुदको सम्भावना धेरै रहेको बताए । उनले पयर्टन प्रवर्धनका लागि जहिले पनि नयाँ अयाम चाहिएकोमा खेलकुद त्यो विकल्प हुन सक्ने भने ।
परिषद्का पूर्वसदस्य घिसिङले पोखराका खेल पयर्टनको विकास र विस्तार गर्न निजी क्षेत्रको प्रत्यक्ष सहभागिता आवश्यक रहेकोमा जोड दिए । उनले यसका लागि नीति नै बनाउनुपर्ने बताए ।
यस्तै भट्टराईले पोखरामा भौतिक पूर्वाधार पर्याप्त रहेको तर त्यसलाई सुहाउँदो प्रतियोगिता नभएको गुनासो पोखे । उनले खेल प्रतियोगिता आयोजना गर्नका लागि आवश्यक समन्वय भइनरहेको दाबी गरे । पालिखेले पनि पोखरा भौतिक पूर्वाधारमा निकै धनी रहेको, तर त्यसको उपयोग भने कम भएको बताए । उनले पोखरामा जति प्रतियोगिता भएका छन्, त्यसलाई प्रोत्साहन आवश्यक रहेको सुनाए ।
‘पयर्टनको प्रमुख हिस्सा खेलकुद’
पोखराका मेयर धनराज आचार्य पोखरा पयर्टनको राजधानी सहर रहेकामा खेलकुद त्यसको मुख्य हिस्सा रहेको बताए । अवार्ड कार्यक्रमको पूर्वसन्ध्यामा मेयर आचार्यले भने, ‘पोखरामा १२ महिना खेलकुद आयोजनाका लागि उपयुक्त छ । नवौं राष्ट्रिय खेलकुदको आयोजनाले पनि यो प्रमाणित भएको छ । पोखरा खेलकुदका लागि भौतिक पूर्वाधारमा पनि धनी छ । हामी चाहन्छौं पोखरामा धेरैभन्दा धेरै राष्ट्रिय तथा अन्तर्राष्ट्रिय प्रतियोगिता होस् ।’
त्यसकै एउटा कडीका रूपमा स्पोर्ट्स अवार्ड रहेको उनको विचार थियो । उनले थपे, ‘आहा रारा गोल्डकप, पोखरा म्याराथन, ड्रायगन बोर्ड रेस र ट्रायथलन जस्तो प्रतियोगिता पोखरा नियमित भइरहेको छ । त्यसैले पोखरा खेलकुद विकासका लागि सधैं तत्पर छ । यही क्रममा पोखरामा यो स्पोर्ट अवार्ड कार्यक्रम आयोजना गर्न पाउँदा धेरै खुसी छौं । खासमा यो अवार्ड भनेको खेलाडीलाई अझ राम्रो खेल्न प्रेरित गर्ने अवसर नै हो ।’
‘पोखराले धेरै अगाडिदेखि राष्ट्रिय तथा अन्तर्राष्ट्रिय उत्पादन गर्दै आएको छ । यो अवार्ड कार्यक्रम यस्ता खेलाडीप्रति एकप्रकारको सम्मान पनि हो । पोखरामा अनेक प्रकारका इभेन्ट्स भइरहेका छन् । अब त्यसमा स्पोटर््स अवार्ड पनि थपिएको छ,’ उनले भने, ‘खासमा हामी पोखरामा समग्रमा खेलकुदको विकासमा भएको हेर्न चाहन्छौं र यो क्रम जारी रहनेछ ।’
