काठमाडौँ — नेपाल प्रिमियर लिग (एनपीएल)का उदयमान खेलाडी घोषित बलर शेर मल्ल पहिलोपटक राष्ट्रिय टोलीमा समावेश भएका छन् । 

मंगलबार नेपाल क्रिकेट संघ (क्यान)ले ट्वान्टी–२० विश्वकप क्रिकेटका लागि घोषणा गरेको १५ सदस्यीय टोलीमा पहिलोपटक मल्ल समावेश भएका हुन् । 

भारत र श्रीलंकामा फेब्रुअरी ७ देखि मार्च ८ सम्म आयोजना हुन लागेको ट्वान्टी–२० विश्वकपका लागि नेपालले रोहित कुमार पौडेलको कप्तानीमा अन्तिम टोली चयन गरेको हो । 

एनपीएलको दुवै सिजनमा उपाधि विजेता टोलीका सदस्य रहेका छन् मल्ल । पहिलो सिजनमा जनकपुर बोल्ट्समा आवद्ध रहेका मल्ल दोस्रो सिजनमा लुम्बिनी लायन्समा थिए । दोस्रो सिजनमा सर्वाधिक विकेटकर्तासमेत बनेका मल्लले एनपीएलमा उदयीमान खेलाडीको उपाधिसमेत पाएका थिए । उनले १७ विकेट लिएका थिए । 

घोषित नेपाली टोलीमा दीपेन्द्रसिंह ऐरी (उपकप्तान), सन्दीप लामिछाने, कुशल भुर्तेल, आसिफ शेख, सन्दीप जोरा, आरिफ शेख, बसिर अहमद, सोमपाल कामी, करण केसी, नन्दन यादव, गुलशन झा, ललित राजवंशी, शेर मल्ल र लोकेश बम छन् । 

अक्टोबरमा ओमानमा भएको ट्वान्टी–२० विश्वकप एसिया–प्यासिफिक छनोट खेलेको टोलीबाट दुई खेलाडी परिवर्तन गरिएको छ । कुशल मल्ल र आदिल अलाम अन्सारीको स्थानमा बसिर र शेरलाई ल्याइएको छ । अघिल्लो महिना सम्पन्न नेपाल प्रिमियर लिगमा लुम्बिनी लायन्सलाई विजेता बनाउनेक्रममा शेर संयुक्त रूपमा सर्वाधिक १७ विकेट लिएका थिए । सोक्रममा उनी इमर्जिङ खेलाडीमा चुनिएका थिए ।