धावकहरु अन्टार्टिकाको माइनस २० डिग्री सेल्सियस तापक्रमदेखि दुबईको २५ डिग्री सेल्सियसमा दौडिनेछन् । म्याड्रिडको तापक्रम भने ५ डिग्री सेल्सियस रहनेछ ।

म्याराथनका सहभागीहरुको आराम तथा बासका लागि होटलको व्यवस्था गरिएको छैन । एक महादेशमा म्याराथनमा दौडिएपछि धावकले अर्को म्याराथनका लागि तयार हुनुपर्नेछ । आयोजकले चार्टर गरेको विशेष जहाजमार्फत धावकहरुलाई त्यहाँबाट अर्को महादेशमा लैजानेछ । 

स्वस्थ रहन दौडिन थालेका जोशी २०२१ देखि सामाजिक कार्य र मानव कल्याणका निम्ति दौडिदै आएका छन् । संसारका विभिन्न देशमा झण्डै दुई दर्जनभन्दा बढी म्याराथनमा सहभागी भएका जोशीले चार वर्षयता स्पोन्सरहरुबाट प्राप्त गरेको दुई लाख डलरभन्दा बढी रकम वान स्टेप फाउण्डेसनमार्फत नेपाल, अमेरिका र अफ्रिकामा बालबालिकाको शिक्षा,स्वास्थ्य, खेलकुद र जेष्ठ नागरिकको भोजनका लागि सहयोग गरेका छन् ।

सुर्खेतमा जन्मिएका ४१ वर्षीय जोशी दुई दशकदेखि अमेरिकामा छन् । टेक्सासको ड्यालस फोर्टवर्थ मेट्रोप्लेक्सको ग्रेपभाइन सिटीमा बस्ने जोशी पेसाले बैंकर्स हुन् । 

नेपाल र अमेरिकाको झण्डा बोकेर नेपाली पोसाकमा दौडिने जोशीले यो म्याराथनलाई नेपाली सम्पदा र नेपालको प्रचारप्रसार गर्ने अवसरका रुपमा लिएका छन् । 

संसारका दुई दर्जनभन्दा बढी म्याराथनमा सहभागी भएपछि उनले अत्यन्त चुनौतीपूर्ण मानिने यो म्याराथनमा सहभागी हुने निर्णय लिएको बताए । ‘त्यसमाथि थोरै दिनमा नेपाली भेषभूषा र सम्पदाको प्रचार प्रसार गर्ने यो उपयुक्त अवसर लाग्यो,’ उनले भने, ‘त्यही कारण यो म्याराथनमा सहभागी हुँदैछु ।’