काठमाडौँ — रोहित पौडेलको कप्तानीमा नेपालले ट्वान्टी–२० विश्वकप क्रिकेटका लागि मंगलबार १५ सदस्यीय टोलीको घोषणा गरेको छ । भारत र श्रीलंकामा फेब्रुअरी ७ देखि मार्च ८ सम्म आयोजना हुन लागेको ट्वान्टी–२० विश्वकपका लागि नेपालले अन्तिम टोली चयन गरेको हो ।

घोषित नेपाली टोलीमा दीपेन्द्रसिंह ऐरी (उपकप्तान), सन्दीप लामिछाने, कुशल भुर्तेल, आसिफ शेख, सन्दीप जोरा, आरिफ शेख, बसिर अहमद, सोमपाल कामी, करण केसी, नन्दन यादव, गुलशन झा, ललित राजवंशी, शेर मल्ल र लोकेश बम छन् ।

अक्टोबरमा ओमानमा भएको ट्वान्टी–२० विश्वकप एसिया–प्यासिफिक छनोट खेलेको टोलीबाट दुई खेलाडी परिवतर्न गरिएको छ । कुशल मल्ल र आदिल अलाम अन्सारीको स्थानमा बसिर र शेरलाई ल्याइएको छ । अघिल्लो महिना सम्पन्न नेपाल प्रिमियर लिगमा लुम्बिनी लायन्सलाई विजेता बनाउनेक्रममा शेर संयुक्तरुपमा सर्वाधिक १७ विकेट लिएका थिए । सोक्रममा उनी इमर्जिङ खेलाडीमा चुनिएका थिए ।