धरान — सातौं कोशी प्रदेशस्तरीय अन्तरविद्यालय डीआईजीपी रनिङ कप फुटबल प्रतियोगिता अन्तर्गत फाइनल खेल शनिबार हुने भएको छ ।

धरान–१३ स्थित नेपाल प्रहरी प्रदेश कार्यालयको खेल मैदानमा आयोजक नेपाल पुलिस स्कुल धरान (रातो) र प्रभात सेकेन्डरी बोर्डिङ स्कुल धरानबीच उपाधिका लागि प्रतिस्पर्धा हुनेछ ।

२०५८ सालदेखि सुरु भएको डीआईजीपी कप छैटौं संस्करणसम्म आयोजना भई २०६३ सालपछि रोकिएको थियो । उक्त अवधिमा धरान–१८ स्थित डिपोट माविले पाँच पटक उपाधि जित्दा मोरङको उर्लाबारीस्थित राधिका मावि एक पटक च्याम्पियन बनेको थियो । विद्यालयस्तरको फुटबलमा निकै प्रतिष्ठित मानिएको यो प्रतियोगिता करिब १९ वर्षपछि पुनः सुरु भएको हो ।

प्रतियोगिता संयोजक तथा प्रहरी निरीक्षक सुरेशकुमार हायुका अनुसार विभिन्न कारणले १९ वर्षसम्म प्रतियोगिता सञ्चालन हुन सकेको थिएन । 'लामो समयपछि प्रतियोगिता पुनः सुचारु गर्न सफल भएका छौं, अब यसलाई निरन्तरता दिँदै जानेछौँ,' उनले बताए ।

यस वर्ष दुवै फाइनलिस्ट टोली पहिलो पटक उपाधि नजिक पुगेका हुन्, जसले प्रतियोगिताले नयाँ च्याम्पियन पाउने निश्चित भएको छ । सेमिफाइनलमा पुलिस स्कुल (रातो) ले सिद्धार्थ बोर्डिङ स्कुल सुन्दरहरैँचा, मोरङलाई ३–० ले हराउँदै फाइनल प्रवेश गरेको थियो । यस्तै, प्रभात सेकेन्डरी बोर्डिङ स्कुलले पिनाकल ज्ञान मन्दिर कानेपोखरी, मोरङलाई ४–० ले पराजित गर्दै उपाधि भिडन्त तय गरेको हो ।

आयोजक पुलिस स्कुलका प्रशिक्षक सागर कार्कीले पहिलो पटक फाइनल खेल्न पाउनु ऐतिहासिक अवसर भएको बताए । 'इतिहास रच्ने अवसर हो,' उनले भने । प्रभातका प्रशिक्षक अमृत राईले पनि पहिलो पटक फाइनल खेल्न पाउँदा खेलाडीहरूमा उत्साह र आत्मविश्वास बढेको उल्लेख गरे ।

फाइनल खेलमा कोशी प्रदेश प्रहरी कार्यालय विराटनगरका प्रमुख डीआईजी विनोद घिमिरे प्रमुख अतिथिका रूपमा उपस्थित हुनेछन् । प्रतियोगितामा कुल १६ टोलीले सहभागिता जनाएका थिए ।