लन्डन — तीव्र गतिका बलर जोफ्रा आर्चरलाई समावेश गर्दै इंग्ल्यान्डले मंगलबार ट्वान्टी–२० विश्वकप क्रिकेटका लागि टोली घोषणा गरेको छ । तर विकेटकिपर जेमी स्मिथले भने टोलीमा स्थान बनाउन सकेनन् ।

चोटका कारण आर्चरले एसेज शृंखलाको अन्तिम दुई टेस्ट गुमाउँदै छन् । उनले चौथो टेस्ट गुमाइसके भने पाँचौं तथा अन्तिम टेस्ट पनि खेल्ने छैनन् । आर्चरसहित अर्का तीव्र बलर जोस टोङ्गले इंग्ल्यान्डको १५ सदस्यीय टोलीमा स्थान बनाएका छन् ।

ह्यारी ब्रुकको कप्तानीमा रहेको इंग्ल्यान्डले भारत र श्रीलंकामा फेब्रुअरी ७ देखि हुने ट्वान्टी–२० विश्वकपको समूह चरणमा नेपाल, इटाली, वेस्ट इन्डिज र बंगलादेशसँग प्रतिस्पर्धा गर्नेछ । नेपालसँग फेब्रुअरी ८ मा मुम्बई वाङ्खडे रंगशालामा खेलेर दुई पटकको च्याम्पियन इंग्ल्यान्डले विश्वकप यात्रा सुरु गर्नेछ । २०२४ मा अमेरिका र वेस्ट इन्डिजमा भएको विश्वकपमा इंग्ल्यान्ड सेमिफाइनलसम्म पुगेको थियो । विश्वकप तयारी क्रममा इंग्ल्यान्डले अर्को महिना गर्ने श्रीलंका भ्रमणमा पनि आर्चर उपस्थित हुने छैनन् । यसै महिना अस्ट्रेलियाविरुद्धको तेस्रो टेस्टमा एडिलेडमा चोट बोकेपछि उनी उपचाररत छन् । जनवरी २२ मा सुरु हुने श्रीलंकाविरुद्धको तीन एकदिवसीय अन्तर्राष्ट्रिय र तीन ट्वान्टी–२० अन्तचर्राष्ट्रियमा आर्चरको स्थान ब्राइडन कार्सीले लिनेछन् । तर कार्सी विश्वकप टोलीमा भने छैनन् ।

टोङ्गले सेतो बलबाट कहिल्यै अन्तर्राष्ट्रिय क्रिकेट खेलेका छैनन् तर एसेजमा भने उनको प्रभावशाली प्रदर्शन देखिएको छ । इंग्ल्यान्डले मेलबर्नको चौथो टेस्ट २ मै जित्दा टोङ्ग ७ विकेट लिई प्लेयर अफ द म्याच बने, जसमा उनले पहिलो इनिङ्समा ५ विकेट लिएका थिए । २८ वर्षे उनले गत सिजन द हन्ड्रेडमा पनि ६ खेलमा सर्वाधिक १४ विकेट लिएका थिए । एसेज शृंखलामा कमजोर प्रदर्शन गरिरहेका सरेका विकेटकिपर स्मिथले विश्वकप गुमाए । जुनमा उनले वेस्ट इन्डिजविरुद्ध २६ बलमा ६० रन बनाएका थिए । एसेज शृंखलाको पहिलो चार टेस्टमा भने उनको ब्याटिङ औसत १९.८५ मात्र छ । विकेट पछाडिको भूमिकामा पनि उनी आत्मविश्वासी देखिएका थिएनन् । त्यसैले इंग्ल्यान्डले विकेटकिपिङमा अनुभवी जोस बटलर र फिल साल्टलाई नै प्राथमिकता दिएको छ । ब्रुकले पहिलो पटक विश्वकपमा इंग्ल्यान्डको कप्तानी गर्न लागेका हुन् । एसेज शृंखलाको कमजोर प्रदर्शनपछि इंग्ल्यान्डको व्यापक आलोचना भइरहेको छ । त्यसैले प्रबन्ध निर्देशक रोब की र प्रशिक्षक ब्रान्डन म्याकलम विश्वकपमा प्रभाव पार्ने आशा राखेका छन् ।