मेलबर्न — इंग्ल्यान्डविरुद्ध अस्ट्रेलियाको टेस्ट । दुई दिनभित्र १ सय ४२ ओभर खेलेपछि नतिजा । भलै, इंग्ल्यान्डले अस्ट्रेलियाली भूमिमा १५ वर्षयता एसेज टेस्टमा पहिलो विजय निकाल्न भयो, तर धेरैले यसमा मेलबर्न क्रिकेट मैदानको पिचलाई लिएर आलोचना गरिरहेका छन् । 

दोस्रो दिनको खेलमा अस्ट्रेलियाको दोस्रो इनिङ्स १ सय ३२ रनमै समेटिएपछि ९२ हजारभन्दा बढी समर्थक निरास हुन पुगेका थिए । त्यसपछि इंग्ल्यान्डले १ सय ७५ रनको लक्ष्य ६ विकेट गुमाई पूरा गरेपछि भ्रमणकारी ‘बार्मी आर्मी’ समर्थकले ठूलो गर्जन निकाले । 

यो त्यही पिच हो, जहाँ पहिलो दिन नै २० विकेट खसेको थियो । जसमा घरेलु टोली अस्ट्रेलिया पहिलो इनिङ्समा १ सय ५२ रनमै अलआउट भयो । जबाफमा इंग्ल्यान्डले पनि १ सय १० रनमात्र बनाउन सक्यो । अस्ट्रेलियाका कप्तान स्टिभ स्मिथ र उनका इंग्ल्यान्डका समकक्षी बेन स्टोक्स दुवैले पिचको स्तरप्रति प्रश्न उठाए ।

‘एकदमै इमानदार भएर भन्नुपर्दा यो हामी कसैले चाहेको पिच होइन,’ इंग्लिस कप्तान स्टोक्सले भने, ‘बक्सिङ डे टेस्टको महत्व सबैलाई थाहै छ । तर दुई दिनभित्रै यस्तो महत्व बोकेको टेस्ट सकियोस् भनेर कोही चाहँदैनन् । यो खेल्नका लागि योग्य थिएन । तर, खेल सुरु भइसकेपछि यसलाई परिवर्तन गर्न सकिँदैनथ्यो । जसरीले पिचले खेल्थ्यो, त्यही अनुसार खेल्नुबाहेकको विकल्प थिएन ।’

अस्ट्रेलियाका कप्तान स्मिथले पिचमा रहेको १० मिलिलिटर घाँसको गहिराइमा बलरहरूले सिमको दुवै भागबाट अवसर निकालेपछि ब्याटिङ गर्न कठिनाइ भएको जनाए । ‘पिच अलिक जटिल नै थियो, सबैलाई खेल्न गाह्रो भइरहेको थियो । दुई दिनभित्रैमा ३६ विकेटभन्दा बढी विकेट जान्छ भने त्यो निश्चय पनि धेरै नै भएको हो,’ स्मिथले भने, ‘यो सम्भवतः उनीहरूले चाहेभन्दा अलिकति बढी भयो । यसलाई झारेर ८ मिलिलिटरमा भएको राम्रो हुनसक्थ्यो ।’

क्रिकेट अस्ट्रेलियाका प्रमुख टड ग्रिनबर्गले कम समय चलेको टेस्टले व्यापार पनि चौपट पार्ने जनाए । सन् १९०९ यता एसेज टेस्टको पहिलो दिनको खेलमा सबैभन्दा बढी विकेट खसेको थियो । पर्थको पहिलो टेस्टको पहिलो दिनमा पनि १९ विकेट झरेको थियो । यो टेस्ट पनि दुई दिनभित्रै टुंगिएको थियो । यसका कारण क्रिकेट अस्ट्रेलियाले आफ्नो आम्दानीमा लाखौं डलर गुमाउन पुगेको छ । 

‘सरल हिसाबमा भन्नुपर्दा व्यापारका लागि खराब हुन्छ, योभन्दा बढी स्पष्टीकरण दिन जरुरी पर्दैन होला,’ ग्रिनबर्गले भने, ‘त्यसैले म ब्याट र बलको अलिकति फराकिलो सन्तुलन देख्न चाहन्छु ।’ इंग्ल्यान्डका पूर्वकप्तान माइकल भोनले मेलबर्नको पिचलाई ‘मजाक’ भनेका छन् । यस्तो टेस्टले खेल नै सकाउन सक्ने उनले बताए । इंग्ल्यान्डका अर्का पूर्व कप्तान एलिस्टर कुकले यसलाई ‘अन्यायपूर्ण प्रतिस्पर्धा’ भनेका छन् । 

पिच बनाउने कुरामा क्युरेटरहरू अस्ट्रेलियामा स्वतन्त्र हुन्छन् । कप्तानहरू र क्रिकेट अस्ट्रेलियाले यसमा प्रभावित पार्न पाउँदैनन् । ग्रिनबर्गले यस घटनापछि हस्तक्षेप हुन जरुरी रहेको ठान्छन् । ‘विशेष गरी व्यावसायिक रूपमा पर्ने प्रभाव देख्दा यसमा अझ बढी संलग्न हुनपर्छ जस्तो लाग्छ । मैदानका कर्मचारीले यस्तो विषयमा अलिक बढी नजर लगाउनुपर्छ ।’

ह्यारी ब्रुक्सले १८ र जेमी स्मिथले ३ रनको अविजित इनिङ्स खेल्दै इंग्ल्यान्डलाई विजयी बनाए । यसअघि ज्याकोव बेथेलले ४० र ज्याक क्रलीले ३७ रन बनाउँदै विजयका आधार बनाएका थिए । पहिलो तीन टेस्टमा अस्ट्रेलियालाई कुनै दबाब नै दिन नसकी पराजित भएपछि इंग्ल्यान्डको चर्को आलोचना आएको थियो । 

इंग्ल्यान्डले सन् २०११ को जनवरीयता अस्ट्रेलियामा पहिलो पटक टेस्ट जितेको हो । त्यसयता इंग्ल्यान्ड १६ टेस्टमा पराजित थियो भने दुई टेस्ट बराबरीमा टुंगिएको थियो । क्रली र बेन डकेटले पुनः ‘बजबल’ शैलीमै इंग्ल्यान्डको ब्याटिङ सुरु गरेका थिए ।