काठमाडौँ — जनवरी दोस्रो साता काठमाडौंमा सुरु हुने आईसीसी महिला ट्वान्टी–२० विश्वकप छनोटमा नेपाल सबैभन्दा कमजोर टोलीको रूपमा रहन सक्छ । पहिलो पटक महिला ट्वान्टी–२० विश्वकप छनोटमा प्रतिस्पर्धा गरिरहेको र प्रतिस्पर्धी १० टोलीमध्ये वरीयतामा नेपाल नवौं स्थानमा रहेकाले नेपाली टोली कमजोर देखिनुको कारण हो । 

नवनियुक्त नेपाली महिला राष्ट्रिय क्रिकेट टोलीका प्रशिक्षक हर्शल पाठक भने निकै सकारात्मक छन् । ‘हामीसँग महिला ट्वान्टी–२० विश्वकपमा छनोट हुने राम्रो सम्भावना छ,’ नेपाल क्रिकेट संघ (क्यान) द्वारा मंगलबार आयोजित पत्रकार सम्मेलनमा प्रशिक्षक पाठकले भने ।

यसअघि नेपालले प्रतियोगिता विशेष विदेशी प्रशिक्षकलाई परामर्शदाताको रूपमा ल्याउने गरे पनि पाठक नेपाली महिला टोलीको पहिलो ‘फुलटाइम’ विदेशी प्रशिक्षक हुन् । मुख्य पक्ष त उनीसँग यसअघि विश्वकपमा टोली डोर्‍याएको अनुभव पनि छ । भारतीय यी प्रशिक्षकको नेतृत्वमा थाइल्यान्डले सन् २०२० को ट्वान्टी–२० विश्वकप खेलेको थियो भने २०२२ मा पाकिस्तानलाई पराजित गर्दै थाइ टोली एसिया कपको सेमिफाइलनसम्म पुगेको थियो । 

‘म नेपाली क्रिकेटको हिस्सा बन्न चाहन्थें, किनभने प्रतिद्वन्द्वी टोलीको रूपमा पनि मैले नेपाली क्रिकेटलाई नजिकबाट हेरिरहेको थिएँ । नेपाली खेलाडीहरूको खेलप्रतिको लगावका कारण म प्रभावित भएर यहाँ आएको छु,’ प्रशिक्षक पाठकले भने, ‘नेपाल विश्वकपमा छनोट हुन्छ भन्नुका केही कारण छन् । पहिलो, यो नेपालमै भइरहेको छ र नेपाली टोलीले घरेलु मैदानमा खेल्दा ठूलो समर्थन पाउने छ । दोस्रो, नेपालसँग यो अवस्थामा प्रतिद्वन्द्वीसँग खेल्ने अनुभव पनि छ ।’

नेपालले जनवरी १४ देखि फेब्रुअरी ३ सम्म आयोजना गर्ने १० राष्ट्र सहभागी प्रतियोगिताको समूह ‘ए’ मा बंगलादेश, आयरल्यान्ड, नामिबिया, पपुवा न्युगिनी र अमेरिका रहेका छन् । समूह ‘बी’ मा नेपालसहित नेदरल्यान्ड्ससहित जिम्बावे, थाइल्यान्ड र स्कटल्यान्ड छन् । प्रतियोगिताका खेलहरू कीर्तिपुरस्थित त्रिवि अन्तर्राष्ट्रिय क्रिकेट मैदान र मूलपानीको माथिल्लो मैदानमा हुनेछ ।

नेपालले जनवरी १४ मा आयरल्यान्डसँग तल्लो मूलपानी र जनवरी १६ मा अमेरिकासँग कीर्तिपुरमा अभ्यास खेल खेल्नेछ । त्यसपछि नेपालले जनवरी १८ मा थाइल्यान्डसँग, जनवरी २२ मा नेदरल्यान्ड्ससँग, जनवरी २४ मा जिम्बावेसँग र जनवरी २६ मा स्कटल्यान्डसँग खेल्ने तालिका छ । नेपालले जिम्बावे र स्कटल्यान्डसँग पहिलो पटक खेल्न लागेको हो । महिला ट्वान्टी–२० विश्वकप छनोटका लागि नेपालको २० सदस्यीय प्रारम्भिक टोली प्रशिक्षणमा छ । प्रशिक्षक पाठक आइतबार नेपाल आइपुगेका हुन् । उनले आउनेबितिकै मूलपानीमा नेपाली महिला क्रिकेट टोलीको सुपर ओभर हेर्न पाएका थिए । यसलाई उनी न्यानो स्वागतको रूपमा लिन्छन् । 

‘मैले हेर्दा खेलाडीहरू राम्रोसँग खेलिरहेका थिए, मुख्य कुरा उनीहरूमा ठूलो उद्देश्य देखिएको थियो,’ पाठकले भने, ‘हातमा ब्याट हुँदा उनीहरू आउट हुन चाहँदैनथे र हातमा बल हुँदा विकेट लिन खोज्थे । यसले उनीहरूको प्रतिस्पर्धात्मक स्तर देखाउँछ,’ पुनेका उनी आफू ठूलो उद्देश्य बोकेर नेपाल आएको सुनाउँछन् ।