लन्डन (एएफपी) — म्यानचेस्टर सिटीलाई दोस्रो स्थानमा रोक्दै आर्सनल इंग्लिस प्रिमियर लिगको शीर्षस्थानमा छ ।

भिक्टर ग्योकोरेसले पेनाल्टीबाट गरेको एकमात्र गोलबाट आर्सनलले एभरटनलाई १–० ले हराएको थियो । अर्को महत्त्वपूर्ण खेलमा लिभरपुलले ९ खेलाडीमा सीमित टोटनहमलाई हरायो ।

मोहम्मद सलाहविना पनि अहिले लिभरपुल लय समात्ने प्रयासमा छ । अंकतालिकाको पुछारमा रहेको उल्भसलाई भने कसैले नचाहने कीर्तिमान जोडिने डर छ । ब्रेन्टफोर्डविरुद्धको खेल गुमाएपछि उल्भस लगातार १० खेलको हारको क्रममा छ । यस सप्ताहन्त प्रिमियर लिगमा चर्चाका तीन बुँदा यी रहे :

• आर्सनललाई क्रिसमसको चिन्ता

एभरटनविरुद्धको खेल जितेपछि आर्सनल क्रिसमस बेला अंकतालिकामा शीर्षमा रहनेछ । चार वर्षयतामा आर्सनल यो समय अगाडि रहने तेस्रोपल्ट हुनेछ । त्यसो त क्रिसमसका बेला शीर्षमा रहनु च्याम्पियन हुने टिमको संकेत हो । तर यही तथ्य आर्सनलका लागि भने लागू हुन्न ।

आर्सनल यसअघि चारपल्ट क्रिसमसका बेला अगाडि रहेको बेला कुनै पनि अवसरमा प्रिमियर लिग जित्न असफल रहेको छ । यसको पछिल्लो दुई उदाहरण त सन् २०२२–०२३ र २०२३–०२४ मै रहेको छ । ती दुवै अवसरमा लिग उपाधि जित्ने टिम थियो म्यानचेस्टर सिटी । अझ खास कुरा त के भने पछिल्ला ५ क्रिसमसमा अगाडि रहेको टिमले लिग नजित्दा च्याम्पियन हुने टिम सिटी नै रहेको छ ।

यही पृृृृृष्ठभूमिमा आर्सनलको उद्देश्य छ, २२ वर्षयता पहिलो पटक लिग जित्ने । प्रशिक्षक मिखेल आर्टेटा भन्छन्, ‘अहिले टिमले जसरी लगातार राम्रो खेलिरहेको छ, त्यसले मलाई आत्मविश्वास प्रदान गर्छ । प्रिमियर लिगमा कुनै पनि टिमका लागि यस्तो लगातार राम्रो खेल्नु सजिलो होइन ।’

• खराब लयमा टोटनहम

टोटनहमले ठ्याक्कै खराब खेलिरहेको छैन । तर, त्यही अनुसार नतिजा भने निकाल्न सकिरहेको छैन । यसले प्रशिक्षक थोमस फ्रान्क भने चर्को दबाबमा छन् । लिभरपुलविरुद्ध घरमै बेहोरेको हारमा पनि टोटनहमको प्रदर्शन उम्दा रहन सकेन । यो हारमा केही दोष प्रशिक्षक फ्रान्कले रेफ्रीको गलत निर्णयलाई दिएका छन् ।