काठमाडौँ — स्विडेनको सबैभन्दा सफल फुटबल क्लब हो, माल्मो । यसले नियमित जस्तै युरोपेली च्याम्पियन्स लिग खेलिरहन्छ । आखिरमा यो त्यही क्लब हो, जहाँबाट ज्लाटन इब्राहिमोभिचले खेल्न सुरु गरेका थिए ।

उनी माल्मो सहरमै जन्मेहुर्केका हुन् । यो भयो, धेरैअघिको कुरा । अहिले यही क्लबमा एक नेपाली खेलाडी व्यवसायिक रूपमा आबद्ध छन् । उनी हुन्, शाश्वत राना ।

गत नोभेम्बरमै मात्र माल्मोले ठूलो महत्त्व दिएर यी १८ वर्षीय खेलाडी शाश्वतलाई अनुबन्ध गरेको सामाचार सुनाएको थियो । अहिले यिनै शाश्वतको चर्चा किनभन्दा उनी अहिले काठमाडौंमा छन्, व्यक्तिगत कामले । चाँडै माल्मोमै फर्किंदै छन् । व्यावसायिक अनुबन्धका कारण उनले नेपाली मिडियासँग खुलेर कुरा गर्न पाएनन् । जति समय काठमाडौंमा बसे, नेपाली फुटबलसँग नजिक रहे अनि राष्ट्रिय टोलीका खेलाडी रोहित चन्दलाई पनि भेटे ।

उनको इच्छा छ, नेपाली राष्ट्रिय टिमबाटै खेल्ने । उनको पासपोर्ट पनि नेपाली नै रहेको छ । तर, उनी जन्मेहुर्केको भने डेनमार्कमा हो । करातेका पूर्व खेलाडी रहेका उनका बुवा विवेक राना दुई दशकअघि डेनमार्क सरेका थिए । उनी अहिले पूर्णतः आफ्नो छोराको फुटबल करियरका लागि भनेर त्यसमै मात्र व्यस्त हुने गर्छन् । राना परिवारको आशा र विश्वास दुवै छ, कुनै दिन शाश्वतले युरोपको अझै ठूलो क्लबबाट खेल्नेछ ।

दक्षिण एसियाका अन्य देशले आफ्नो मूलका विदेशी खेलाडी राष्ट्रिय टिमबाट खेल्ने अवसर दिन थालेको बेला नेपाली नागरिकतामै कायम रहेका शाश्वतलाई खेलाउन अझ कुनै कठिनाइ हुने छैन । त्यसो त म्याट रस नेपाली राष्ट्रिय टिमका प्रशिक्षक हुँदा उनीसँग सम्पर्कमा थिए । मलेसियाविरुद्धको खेल अगाडि उनीहरूबीच दोहोरो कुराकानी भएको थियो, तर त्यसले ठोस आकार भने लिन सकेन ।

शाश्वतको सबैभन्दा ठूलो विशेषता भन्नु नै नेपाली खेलाडीको रूपमा युरोपको व्यावसायिक क्लबसँग आबद्ध हुन सक्नु हो । अझ माल्मो त आफैंमा ठूलो क्लब हो । अहिलेका लागि उनी माल्मोको रिजर्भ टिमबाट खेलिरहेका छन् । विश्वास के छ भने उनले चाँडै मूल टिममा प्रवेश पाउनेछन् । अहिलेका लागि माल्मोले यी लेफ्ट ब्याक खेलाडीसँग तीन वर्षको अनुबन्ध गरेको छ ।

त्यतिबेला क्लबका सहायक स्पोर्ट्स डाइरेक्टर ओला टोइभोमाकीले भनेका थिए, ‘शाश्वत उत्कृष्ट खेलाडी हुन् । उनको सम्भावना धेरै छ । पछिल्लो दुई वर्षमा रक्षात्मक फुलब्याकका रूपमा उनको प्रदर्शन उच्च रहेको छ ।’ सानो छँदा उनी सात वर्षको उमेरमै डेनमार्कको हेलरपसँग आबद्ध भए । पछि लुम्बीले उनलाई अनुबन्ध गरिहाल्यो । उनको उच्च प्रदर्शनकै कारण १५ वर्षको उमेरमा एफसी कोपनहेगन पुगे ।