देशले साफ च्याम्पियनसिप फाइनल पुगेर हार भोग्दै आएको पीडादायी इतिहासबीच एपीएफसामु घरमै उपाधि दिलाउने अवसर
What you should know
काठमाडौँ — जतिबेला साफ वुमेन्स च्याम्पियनसिप फुटबलको कुरा गर्छौं, एउटै तथ्य घुमाइफिराइ आइपुग्छ । यो हो, नेपालले कहिले पनि यो प्रतियोगिता जित्न सकेको छैन । भलै, नेपालले लगभग लगातार फाइनल खेलेको छ ।
यस्तोमा एपीएफ क्लबसामु शनिबार एउटा दुर्लभसँगै ऐतिहासिक अवसर हुनेछ, पहिलो संस्करणको साफ वुमेन्स क्लब च्याम्पिनयसिप जित्ने । टोलीले यो काम साँच्चै पूरा गर्छ भने त्यसले साफ च्याम्पिनयसिप फाइनलका सबै हारको पीडा केही हदसम्म भुलाउन सक्छ ।
तर, यो काम सजिलो भने हुने छैन, किनभने दशरथ रंगशालामा हुने फाइनलमा उसको प्रतिद्वन्द्वी छ, भारतीय टोली इस्ट बंगाल । यो त्यस्तो टिम हो, जसले लिग चरणमा आफूलाई अब्बल साबित गरेको छ । कुल ५ टिमसम्मिलित प्रतियोगितामा भारतीय च्याम्पियन इस्ट बंगाल ४ खेलबाट १० अंकसहित पहिलो स्थानमा रह्यो । एपीएफ भने ८ अंकसहित दोस्रोमा थियो । शीर्ष दुई स्थानमै रहेर दुवै टिमले फाइनल खेल्न लागेको हो ।
दुईबीचको लिग चरणको खेल भने गोलरहित बराबरीमा टुंगिएको थियो । यो नतिजाले फाइनलमा भने खास अर्थ बोक्ने छैन । किनभने उपाधि भिडन्तमा प्रत्येक टिमको मानसिकता र सोच नै फरक हुने गर्छ । इस्ट बंगालका प्रशिक्षक एन्थोनी सामसनले एपीएफ निकै बलियो टिम भन्दै धेरैपल्ट प्रशंसा गरेका छन् । यो सम्भवतः उनको ‘माइन्ड गेम’ मात्रै हो । किनभने उनले सुरुमै भनेका छन्, इस्ट बंगाल काठमाडौंमा सहभागी हुनमात्र आएको होइन, उपाधि जित्नकै लागि हो ।
लिग चरणका खेलपछि सबैले ठ्याक्कै के पनि अनुभव गरेका छन् भने सम्भवतः इस्ट बंगाल एपीएफको तुलनामा केही हदसम्म राम्रो देखिएको छ । टोलीको खेल व्यावसायिक छ । अनि उसका युगान्डाली खेलाडी फजिला इक्वापुट उत्कृष्ट नै छन् । एपीएफलाई लिएर एउटै चिन्ता के हो भने उसले अहिलेसम्म आफ्नो स्वाभाविक लय भेट्टाउन सकेको छैन, त्यो भने धेरै हदसम्म गोलका लागि टिम संघर्षरत छ । यस्तोमा फाइनल अगाडिको मूल सार हो, एपीएफले फाइनलमा इस्ट बंगाललाई हराउने हो भने अहिलेसम्मकै उत्कृष्ट खेल प्रदर्शन गर्नुपर्नेछ ।
फाइनलको पूर्वसन्ध्यामा शुक्रबार आयोजित प्रेस मिटमा दुवै टिमका कप्तान र प्रशिक्षक भने उत्साही रहे । एपीएफकी कप्तान अनिता बस्नेतले आफ्नो टिम फाइनलका लागि सबै प्रकारले तयार रहेको बताएकी छन् । उनी भन्छिन्, ‘अहिले हामीले क्लबका लागि भन्दा पनि देशको प्रतिनिधित्व गरेर खेलिरहेका छौं । त्यसैले हामी सबै उत्साही छौं । देशले अहिलेसम्म केही जित्न नसकेको स्थितिमा जितको पदक दिलाउने प्रयास गर्नेछौं । हामी सबै त्यसकै प्रतीक्षामा छौं ।’
अनिताले यो प्रतियोगिताको ठूलो महत्त्व रहेको दाबी गर्दै आफ्ना खेलाडीलाई राम्रो खेल्न प्रेरित गर्ने एउटा कारण पनि बताइन् । उनको भनाइ थियो, ‘हाम्रा सबै बहिनीले मौका पाएका छन्, तिनले राम्रो खेल्नुपर्छ । उनीहरूप्रति अन्य क्लबको पनि नजर हुनेछ, यो स्वर्णिम अवसर हो ।’
प्रशिक्षक जीवेश पाण्डेले पनि उपाधि जित्नका लागि सक्दो सबै प्रयास हुने बताए । उनले भने, ‘इस्ट बंगाल राम्रो टिम रहेकोमा शंका छैन । उनीहरूलाई रोक्न हामीले आफ्नो खास कमजोरी के तथ्यमा रहेको छ, त्यसमै सुधारको प्रयास गरेका छौं ।’
अर्कोतर्फ इस्ट बंगालका प्रशिक्षक सासमन भन्छन्, ‘फाइनलमा हामीले धेरै दर्शक अपेक्षा गरेका छौं । खेल पनि माथिल्लो दर्जाको हुनेछ । हामी यो दुवैका लागि तयार छौं । हामीलाई राम्रोसँग के थाहा छ भने हामी किन नेपाल आएका हौं । हाम्रो हातमा जे छ, त्यसअनुसार राम्रो खेल्नेछौं ।’ कप्तान इक्वापुटले पनि भन्छिन्, ‘एपीएफ बलियो टिम हो, तर हामीलाई हाम्रा खेलाडीमा पूर्ण विश्वास छ ।’
