गोरखा — आरुघाटमा भएको भलिबल प्रतियोगिताको उपाधि घले हार्भेस्टिङ क्लबले जितेको छ । शनिबार भएको फाइनल खेलमा तनहुँको शुक्लागण्डकी नगरपालिकालाई ३–१ को सेटले पराजित गर्दै घले हार्भेस्टिङले उपाधि जितेको हो । उपाधि विजेता घले हार्भेस्टिङले दुई लाख १० हजार नगदको साथमा ट्रफी, मेडल र प्रमाणपत्र प्राप्त गरेको छ ।

उपविजेता शुक्लागण्डकी नगरपालिकाले एक लाख २५ हजार र तेस्रो बनेको बौद्धकालीका नगरपालिका नवलपुरले ७५ हजार रुपैयाँ पुरस्कार पाएको छ । त्यस्तै, सान्त्वना बनेको भिमसेन थापा गाउँपालिकाले २५ हजार रुपैयाँ पुरस्कार प्राप्त गरेको आयोजक आरुघाट युवा क्लबका खेल संयोजक सोभित श्रेष्ठले बताए ।  

त्यस्तै, महिलातर्फ आरुघाट युवा क्लब (आयोजक) पहिलो बनेको छ । मनास्लु भलिबल ट्रेनिङ सेन्टर काठमाडौंलाई ३–० को सोझो सेटले पराजित गर्दै आरुघाट युवा क्लब विजयी भएको हो । 

पहिलो बनेको आरुघाट युवा क्लबले एक लाख ६० हजार रुपैयाँको साथमा ट्रफी, मेडल र प्रमाणपत्र प्राप्त गरेको श्रेष्ठले बताए । मनासलु भलिबल ट्रेनिङ सेन्टर काठमाडौं दोस्रो बनेको छ भने पन्द्रुङ युवा क्लब तेस्रो बनेको छ । दोस्रो र तेस्रो बन्ने टिमले क्रमश: १ लाख र ५० हजार  नगदको साथमा ट्रफी, मेडल र प्रमाणपत्र प्राप्त गरेको आयोजकले जनाएको छ । सान्त्वना बनेको जैमिनी गाउँपालिका बागलुङ टिमले भने २५ हजार रुपैयाँ प्राप्त गरेको छ ।