काठमाडौँ — इन्टरनेसनल ओपन फ्रेन्डसिप तेक्वान्दो च्याम्पियनसिप (आईओएफटीसी) नेपालबाट सुरु भएको तेक्वान्दो प्रतियोगिता हो ।

सन् २००० मा पहिलो पटक इन्टरनेसनल ओपन फ्रेन्डसिप तेक्वान्दोको आयोजना भएको थियो । अहिले यो १५ औं संस्करणमा आइपुगेको छ । फेरि यो प्रतियोगिता नेपालमा आयोजना हुन गइरहेको छ । यही पुस ४ र ५ गते त्रिपुरेश्वरस्थित राखेप कभर्डहलमा प्रतियोगिताको १५ औं संस्करण हुँदै छ ।

त्यसको सम्पूर्ण तयारी पूरा भएको आईओएफटीसी नेपाल च्याप्टरले जनाएको छ । आईओएफटीसीका संस्थापक तथा निर्देशक संस्थापक दिवाकर महर्जनले इन्टरनेसनल ओपन फ्रेन्डसिप तेक्वान्दो च्याम्पियनसिपले २५ वर्षको यात्रा तय गरेको बताउँदै यसपल्ट अझ प्रतियोगिता भव्य रूपमा आयोजना हुन बताए ।

उनले भने, ‘आइओएफटिसीले आफ्नो उद्देश्यअनुरुप तेक्वान्दोमार्फत् खेलभावना, मैत्री र अन्तर्राष्ट्रिय एकता प्रवर्द्धन गर्दै आएको छ । फेरि आफ्नै भूमिमा आयोजना गर्न आइपुगेका छौं ।’

अमेरिकाको पोर्टल्यान्डस्थित आईओएफटीसीले प्रत्येक दुई वर्षमा यो तेक्वान्दो च्याम्पियनसिप आयोजना गर्दै आइरहेको छ । पालैपालो एक संस्करण अमेरिका र अर्को संस्करण अमेरिकाबाहिर गर्ने गर्दछ । त्यसअनुसार पोर्टल्यान्डमा ५ संस्करण, नेपालमा ४ संस्करण, भारत, बेलायत र हङकङ, अमेरिकाकै मिचिगन र दक्षिण कोरियाको सोलमा एक–एक संस्करणको आयोजना आईओएफटीसीले जनाएको छ ।

आईओएफटिसी नेपालका अध्यक्ष मीनप्रसाद खनालले १५ औं संस्करण आयोजना गर्ने जिम्मेवारी नेपाललाई पुनः दिइएकामा आईओएफटीसी हेडक्वार्टरप्रति आभार व्यक्त गरे । 

आईओएफटीसी नेपालका महासचिव गिरिबहादुर सुनारले नेपालमा हुने १५ आौ संस्करण अझ भव्य बनाउने लक्ष्यअनुरुप अन्तिम दिन सांस्कृतिक महोत्सव पनि गरिने बताए । उनले नेपालको समृद्ध सांस्कृतिक विविधता र अन्तर्राष्ट्रिय मैत्रीभावको सन्देश प्रवाह हुने उनको भनाइ छ ।

प्रतियोगिताका अन्तर्राष्ट्रिय संयोजक अशोक खड्काले च्याम्पियनसिपमा आयोजक नेपाल, दक्षिण कोरिया, अमेरिका, फिलिपिन्स, अस्ट्रेलिया, अस्ट्रिया, क्यानडा, पाकिस्तान, भारत, हङकङ, चीन, मेक्सिको, माल्दिभ्स, बंगलादेशलगायतका राष्ट्रका खेलाडीले भाग लिने जानकारी गराए । उनका अनुसार प्रतियोगितामा करिब एक हजार खेलाडी, प्रशिक्षक र रेफ्रीको सहभागिता रहनेछ ।

वर्ल्ड तेक्वान्दोको नियमअनुसार हुने च्याम्पियनसिपमा ग्योरोगी (फाइट) र पुम्से (फर्म) विधा समावेश छ । सिनियर पुरुष र महिलाको ८–८ तौल समूहमा प्रतिस्पर्धा हुनेछ । जुनियरतर्फ महिला र पुरुष गरी १०–१९ तौल समूह र क्याडेटतर्फ १०–१० तौल समूहमा खेलाइने छ । सिनियर, जुनियर र क्याडेट पुम्सेमा व्यक्तिगत, जोडी र टिम गरी तीन इभेन्टमा प्रतिस्पर्धा हुनेछ । यसबाहेक बोर्ड ब्रेकिङ इभेन्ट समावेश गरिएको छ । च्याम्पियनसिपमा ६५ स्वर्ण, ६५ रजत र १३० कांस्य पदकका लागि प्रतिस्पर्धा हुनेछ । विजेतासहित उत्कृष्ट खेलाडी, प्रशिक्षक र रेफ्रीलाई नगद पुरस्कार प्रदान गरिने जनाइएको छ । कुल पुरस्कार राशि ७ लाख २५ हजार रुपियाँ रहेको च्याम्पियनसिपको बजेट १ करोड ४ लाख रुपैयाँ रहेको निर्देशक महर्जनले जानकारी गराए ।