दुबई इन्डोर स्टेडियममा भएको पारा गेम्सको टेबलटेनिस यू–२३ पुरुष सिंगल (क्लास ७) को फाइनलमा स्वीकृत भने चाइनिज ताइपेईका रेन तिङ ह्वाङसँग ३–२ को सेटमा पराजित भएका थिए ।
काठमाडौँ — यूएईमा भइरहेको एसियन युथ पारा गेम्सको टेबलटेनिसमा नेपाली पारा खेलाडी स्वीकृत न्यौपानेले रजत पदक जितेका छन् ।
दुबई इन्डोर स्टेडियममा भएको पारा गेम्सको टेबलटेनिस यू–२३ पुरुष सिंगल (क्लास ७) को फाइनलमा स्वीकृत भने चाइनिज ताइपेईका रेन तिङ ह्वाङसँग ३–२ को सेटमा पराजित भएका थिए । निर्णायक सेटमा अग्रता लिनुका बावजुद उनले सेट गुमाएका थिए ।
स्वीकृतले पहिलो सेट १३–११, तेस्रो सेट १२–१० ले आफ्नो पक्षमा पारे पनि दोस्रो ११–६, चौथो ११–५ र निर्णायक तथा पाँचौं सेट १२–१० ले गुमाएका थिए ।
स्वीकृतले सेमिफाइनलमा फिलिपिन्सका ब्रागे काबान्द्रोलाई ३–१ (११–९, ११–८, ५–११ र ११–९) ले हराएर स्वर्ण पदकको दाबेदार बनेका थिए । त्यसअघि लिग चरणमा उनले काजकिस्तान, किर्गिस्तान र इराकका खेलाडीलाई हराएर अन्तिम चारमा स्थान बनाएका थिए ।
टेबलटेनिसमा स्वीकृतसहित महिलातर्फ निर्मला भण्डारीले सहभागिता जनाएकी छन् । प्रशिक्षकमा वसन्त भारती रहेका छन् ।
११ खेल समावेश एसियन पारा युथ गेम्समा नेपालले टेबलटेनिससहित तेक्वान्दो, एथलेटिक्सलगायतको खेलमा सहभागिता जनाएको छ ।
