कम्तीमा ७५ हजार अमेरिकी डलर पुरस्कार सुनिश्चित, अन्तर्राष्ट्रिय प्रतियोगिताको व्यक्तिगत इभेन्टमा नेपाली खेलाडीले जित्ने यो ठूलो पुरस्कार राशि हो
काठमाडौँ — नेपाली बक्सर चन्द्रबहादुर थापाले वर्ल्ड बक्सिङ च्याम्पियनसिपबाट ऐतिहासिक सफलता दिलाउने भएका छन् । युएईमा भइरहेको आईबीए मेन्स वर्ल्ड बक्सिङ च्याम्पियनसिपको आफ्नो तौल समूहमा चन्द्रबहादुर सेमिफाइनलमा पुगेका छन् । सेमिफाइनल पुगेसँगै उनी कम्तीमा कांस्यको हकदार भएका छन् । बक्सिङको वर्ल्ड च्याम्पियनसिपमा नेपालले जित्न लागेको यो पहिलो ऐतिहासिक पदक हुनेछ ।
५४ केजी तौल समूहका चन्द्रले इरानी बक्सर मेहदी काजेमीलाई युनानिमस डिसिजनका आधारमा ५ः० ले पराजित गर्दै अन्तर्राष्ट्रिय बक्सिङ एरिनामा नेपालको उपस्थितिलाई गर्विलो बनाएका थिए । यसअघि इन्डोनेसिया र आर्मेनियाका बक्सरलाई पराजित गर्दै उनले क्वाटरफाइनलमा स्थान बनाएका हुन् । कांस्य पदक पक्कावापत उनले कम्तीमा ७५ हजार अमेरिकी डलर पुरस्कार सुनिश्चित गरेका छन् । अन्तर्राष्ट्रिय प्रतियोगतिामा यो व्यक्तिगत इभेन्टमा नेपाली खेलाडीले जित्ने ठूलो पुरस्कार राशि पनि हो ।
उनी सेमिफाइनलमा काजकिस्तानका खेलाडीसँग भिड्ने छन् । जित पाएको खण्डमा फाइनल पुग्दै चन्द्र १ लाख ५० हजार अमेरिकी डलर पुरस्कारको हकदार बन्नेछन् । यो नेपाली बक्सिङ इतिहासकै ठूलो सफलतासँगै पुरस्कार राशि हुनेछ ।
मिसन २०२६ को क्याम्पमा रहेका चन्द्रबहादुरले घरेलु प्रतियोगिता नेपाल पुलिस क्लबबाट खेल्छन् । रोल्पाका उनले दाङको अल्फा बक्सिङ क्लबबाट २०७४ सालमा बक्सिङ करिअर सुरु गरेका थिए । सातौं र आठौं राष्ट्रिय खेलकुदमा तेस्रो भएका चन्द्रले नवौं राष्ट्रियमा स्वर्ण जितेका थिए । आधा दर्जन अन्तर्राष्ट्रिय प्रतियोगिताको अनुभव रहेका उनको ठूलो सफलता वर्ल्ड च्याम्पियनसिप नै हो ।
क्वाटरफाइनल जितेपछि उनले कान्तिपुरसँग भने, ‘एकदमै उत्साही छु, ठूलो सपना पूरा भएको छ । वर्ल्ड च्याम्पियनसिपमा पदक जित्नु मेरा लागि एउटा सपना थियो ।’ उनले अब एसियन, ओलम्पिक गेम्समा पदक जित्ने लक्ष्य रहेको सुनाए । उनका प्रशिक्षक रहेका दीपक महर्जनले चन्द्रले आफ्नो पनि सपना पूरा गरिदिएको सुनाए । आईबीए थ्रीस्टार प्रशिक्षक महर्जनले भने, ‘खेलाडी रहँदा मेरो पनि वर्ल्ड च्याम्पियनसिपमा पदक जित्ने सपना थियो । त्यो पूरा हुन सकेन । एसियाडमा मात्र पदक जित्न सकें । अहिले मेरो खेलाडीले पूरा गरिदिएको छ । म पनि एकदमै खुसी छु । नेपाली बक्सिङले ठूलो उचाइ पाएको छ ।’
त्यस्तै ४८ केजी तौलका लालबहादुर उप्रेती भने क्वाटरफाइनलमा पराजित भएका छन् । प्रभावशाली प्रदर्शन गरेका उनी काजकिस्तानका तेमिरतास जुसुपोभासँग ५ः० ले पराजित भए । उनी इथियोपिया र माल्दोभाका बक्सरलाई हराएर क्वाटरफाइनल पुगेका थिए । उनले १० हजार डलर पुरस्कार पाएको प्रशिक्षक महर्जनले बताए । प्रतियोगितामा नेपालका ५ बक्सरले भाग लिएका थिए ।
