पाल्पा — बाग्लुङको नरेठाँटी युवा क्लब (एनवाईसी) गल्कोटले पाल्पाको रामपुर नगरपालिकास्थित दोस्रो भम्बक युनाइटेड भलिबल कपको उपाधि जितेको छ । 

रामपुर नगरपालिका–५, रामपुर भम्बकमा सम्पन्न प्रतियोगिताको फाइनलमा एनवाईसी बाग्लुङ्ले आयोजक भम्बक युनाइटेड क्लबलाई ३–० को सोझो सेटमा हराउँदै उपाधि जितेको हो ।

क्लबस्तरीय आमन्त्रित भलिबल प्रतियोगिता अन्तर्गत फाइनलमा आयोजक भम्बक युनाइटेडलाई २५–२२, २५–१३ र २५–२० अंकसहित जित हात पारेको हो । जितसँगै विजेता एनवाइसी नरेठाँटी युथ क्लबले नगद २ लाख रुपैयाँसहित सिल्ड मेडल र प्रमाण पत्र प्राप्त गरेको छ । 

उपविजेता आयोजकले १ लाख रुपैयाँसहित सिल्ड, मेडल र प्रमाणपत्रमा चित्त बुझायो । तेस्रोका लागि भएको प्रतियोगितामा ठकुरी दर्शन समाज शुक्लगण्डकी तनहुँलाई पाल्पा भलिबल संघले ३–१ को सेटमा परचजित गरेको छ । 

प्रतियोगिता अन्तर्गत पहिलो, दोस्रो र चौथो सेट पाल्पा भलिबल संघले २५–२३, २५–२३ र २५–१५ अंक सहित हात पारेको थियो भने तेस्रो सेट ठकुरी समाजले २५–२० अंकसहित जित हासिल गरेको थियो । पाल्पा भलिबल संघले तेस्रो भएसँगै ५० हजार र सान्तवना भएको शुक्लागण्डकी तनहुँले ३० हजार नगद, ट्रफी र प्रमाणपत्र पाएको छ ।