काठमाडौँ — लुम्बिनी लायन्सका कप्तान रोहित पौडेलले नेपाल प्रिमियर लिग (एनपीएल) मा बुधबार टस जितेपछि फिल्डिङ रोज्नुको कारण स्वाभाविक नै थियो । तर उनीसामु चुनौती निकै ठूलो थियो । रोहितले विराटनगर किंग्सलाई ब्याटिङ निम्तो दिएपछि क्रिजमा आए दक्षिण अफ्रिकी ब्याटिङ स्टार फाफ डु प्लेसिस । 

डु प्लेसिससँगै अर्का ब्याटर थिए जर्ज मन्सी । रोहितले पहिलो ओभरमै स्पिनर शेर मल्ललाई बलिङको जिम्मा दिएर विराटनगरको ब्याटिङ घेर्ने प्रयास गरे । शेरले आफ्नो कप्तानलाई निरास बनाएनन् । दोस्रो बलमै शेरले मन्सीलाई शून्यमा एलबीडब्लू आउट गरेपछि लुम्बिनीको आत्मविश्वास बढेको थियो । 

अभिषेक गौतमलाई तेस्रो ओभर बलिङ गर्न दिइयो । डु प्लेसिसले उनको पहिलो बलमै चौका प्रहार गरे । तर उक्त ओभरको अन्तिम बलमा अभिषेकले जादु देखाए । डु प्लेसिस स्टेपआउट गर्न अगाडि बढ्दा अभिषेकले ‘सार्प टर्न’ गरेर अफ स्टम्प बाहिर गएको बलमा निरोशन डिकवेलाले स्टम्पिङ गरिदिए ।

लुम्बिनीबाट प्रतियोगितामा सबै खेल खेल्दै आएका अभिषेकले अघिल्ला ५ खेलमा ३ विकेट लिएका थिए । उनले सुदूरपश्चिम रोयल्ससँगको खेलमा जस ब्राउनको विकेट लिए । त्यस्तै चितवन राइनोजविरुद्ध दीपक बोहरा र देव खनाललाई आउट गरेका थिए । 

मन्सी र डु प्लेसिसको महत्त्वपूर्ण विकेट लिएपछि लुम्बिनीले खेल नियन्त्रणमा राख्यो । विराटनगरले पावर प्लेमा ३४ रनमात्र बनाउन सक्यो । १० ओभरमा टोली ५९–२ को स्थितिभन्दा माथि जान सकेन । विराटनगरले निर्धारित २० ओभर खेल्दा ८ विकेट गुमाई १ सय ४४ रनमात्र बनाउन जोड्न सक्यो । 

एनपीएलमा पहिलो खेल खेलिरहेका डु प्लेसिसले १२ रनमात्र बनाउन सके । ९ बल खेलेका उनले २ चौका प्रहार गरे । उनले ओपनिङमा ब्याटिङ गरेपछि तेस्रो नम्बरमा आएका लोकेश बमले विराटनगरबाट सर्वाधिक ३५ रन बनाए । ४२ बलमा २–२ चौका र छक्का प्रहार गरेका लोकेशलाई जेजे स्मिटले कट एन्ड बोल्ड गरे । साम हेजलेटले २७ रन बनाए । उनले २० बलमा १ चौका र २ छक्का प्रहार गरे ।

नारायण जोशी ५, प्रतिश जिसी ११, बसिर अहमद १९ बलमा१ चौका र १ छक्कासहित २८ र साहिल पटेल ३ रनमा आउट भए । इनिङ्सको अन्तिम बल सामना गर्न आएका कप्तान सन्दीप लामिछानेले छक्का प्रहार गरे । मर्च्येन्ट डी ल्याङ्गे ८ बल खेल्दै १० रनमा अविजित रहे । लुम्बिनीबाट शेरले ३ विकेट लिए । प्लेयर अफ द म्याच उनले ४ ओभरमा २५ रनमात्र खर्चिए । अभिषेकले ४ ओभरमा २१ रन खर्चेर १ विकेट लिए । नामिबियाका जोडी रुबेन ट्रम्पलमनले ४ ओभरमा २४ र स्मिटले ३ ओभरमा ३४ रन खर्चेर १–१ विकेट लिए । 

डी’आरसी शटले ४४ बलमा ५७ रन बनाएपछि लुम्बिनीले कीर्तिपुरस्थित त्रिवि अन्तर्राष्ट्रिय क्रिकेट रंगशालामा १७.४ ओभरमै लक्ष्य पूरा गर्दै ५ विकेटको जित पायो । ६ खेलमा तेस्रो विजय नतिजा निकालेको लुम्बिनीले प्लेअफमा पुग्ने आशा कायमै राखेको छ । लुम्बिनी अहिले चौथो स्थानमा छ । 

आफ्नो अन्तिम खेलमा जनकपुर बोल्ट्सलाई पराजित गरेमात्र लुम्बिनी प्लेअफमा सुरक्षित हुने सम्भावना बन्छ । विराटनगरको ६ खेलमा यो दोस्रो हार हो । ८ अंकसहित तेस्रो स्थानमा रहेको विराटनगरले शनिबार सुदूरपश्चिम रोयल्ससँग आफ्नो अन्तिम खेल खेल्नेछ । 

अस्ट्रेलियन ब्याटर शटले ६ चौका र २ छक्का प्रहार गर्दै लुम्बिनीलाई विजय दिलाउन महत्त्वपूर्ण भूमिका खेले । प्रतियोगितामा यो उनको पहिलो अर्धशतक हो । उनले र डिकवेलासँग २४ बलमा ४६ रनको साझेदारी गरे । शट र सुमित महर्जनले पहिलो ४ ओभरमा २९ रन जोड्दै लुम्बिनीलाई राम्रो सुरुआत दिलाएका थिए । तर, पाँचौं ओभरमा सुवास भण्डारीले सुमितलाई १० र कप्तान रोहितलाई शून्यमा आउट गरी विराटनगरलाई खेलमा फर्काउने प्रयास गरे । सुमितलाई स्टम्पआउट गराएका सुवासले रोहितलाई डु प्लेसिसबाट सानदार क्याचआउट गराए ।