त्यसको अर्थ पछिल्लो ‘ए’ डिभिजनमा शीर्ष ६ स्थानमा रहेका टिमले मात्र अब राष्ट्रिय लिग खेल्ने पाउने छैनन् । इच्छा भएका अरूसामु पनि विकल्प खुलेको छ । बैठकले एउटा अर्को ठूलो निर्णय पनि गरेको छ । यसको कार्यान्वयन पनि उसकै हातमा मात्र हुने छैन । त्यस अनुसार एन्फाले एसियाली फुटबल महासंघ (एएफसी) को ‘इक्वेल पिच’ कार्यक्रमअन्तर्गत दशरथ रंगशालमा हाइब्रिड घाँसे मैदान राख्ने प्रस्ताव पनि गरिएको छ । 

यसका लागि राष्ट्रिय खेलकुद परिषद्‌देखि सरकारकै सहमति र सहयोग चाहिने छ । ‘सरकारबाट यसमा सहयोगकै अपेक्षा गरेका छौं र हामीले आवश्यक प्रक्रिया पनि पूरा गर्ने छौं,’ महासचिव राईले थपे । 

कार्यसमितिले महिला फुटबलसम्बन्धी पनि दुई प्रमुख निर्णय गरेको छ । त्यसमा अब महिला फुटबलको पनि फ्रेन्चाइज लिग गरिन निर्णय भएको छ । फागुनमा यू–१९ साफ महिला फुटबल पोखरामा आयोजना हुनेछ । राष्ट्रिय महिला नकआउट प्रतियोगिता उदयपुरमा गर्ने निर्णय भएको छ । एन्फाले मंसिर १९ देखि पुस ५ सम्म दशरथ रंगशालामा हुने साफ क्लब वुमेन्स च्याम्पियनसिपका लागि आवश्यक सबै तयारी अगाडि बढिरहेको पनि जनाएको छ । प्रतियोगितामा दक्षिण एसियाका पाँच लिग च्याम्पियन टिमको सहभागिता रहनेछ ।