काठमाडौँ — जेरहार्ड इरसमस र जोहन सिम्पसनको सानदार ब्याटिङमा काठमान्डु गोर्खाजले नेपाल प्रिमियर लिग (एनपीएल) मा आइतबार कर्णाली याक्सलाई ५ विकेटले पराजित गर्दै आफूलाई प्लेअफ नजिक पुर्‍याएको छ । 

काठमान्डुको यो लगातार तेस्रो जित हो । ६ खेलमा चौथो जित हात पारेपछि काठमान्डु दोस्रो स्थानमा उक्लिएको छ । समान ८ अंक भए पनि काठमान्डुले विराटनगरलाई नेट रन रेटमा उछिन्दै दोस्रो स्थानमा ओगटेको हो । कर्णालीले ५ खेलमा चौथो पराजय भोग्यो । 

इरसमस र सिम्पसनले ४५ बलमा ८६ रनको साझेदारी गरेपछि काठमान्डुले कीर्तिपुरस्थित त्रिवि अन्तर्राष्ट्रिय क्रिकेट मैदानमा १ सय ५० रनको लक्ष्य १२ बलअगाडि १ सय ५५ रन बनाएर पूरा गरेको थियो । काठमान्डुलाई जितका लागि १ रन आवश्यक हुँदा देव्रेहाते ब्याटर सिम्पसन बलर नन्दन यादवको बलमा आउट भएका थिए ।

नन्दनले त्यसपछि आएका रशिद खानलाई अर्को बलमा आउट गरे । दुई बलपछि भीम सार्कीले छक्का प्रहार गर्दै विजयी रन बटुले । सिम्पसनले २१ बल खेल्दै ४ चौका र २ छक्का प्रहार गरेर ४१ रन बनाए । प्लेयर अफ द म्याच इरसमसले ३३ बलमा अविजित ४३ रन बनाए । यूएईको आईएल टी–२० खेल्न दुबई जान लागेका नामिबियाका कप्तान इरसमसले समान २ चौका र छक्का प्रहार गरे । 

इरसमसले आफ्नो खेलभन्दा पनि टिमको जित महत्त्वपूर्ण भएको बताए । ‘यो मेरो अन्तिम खेल पनि थियो, राम्रो प्रदर्शनका लागि म अलिकति संघर्ष पनि गरिरहेको थिएँ, सधैं राम्रो खेल्न सकिन्छ भन्ने होइन,’ इरसमसले भने, ‘समयमै राम्रो प्रदर्शन दिन सके, त्यसमा खुसी छु । १–२ वटा राम्रो साझेदारी गर्न सक्ने हो भने विकेट राम्रो भएका कारण पछि बाउन्ड्री आउन सजिलो हुन्छ भनेर मैले र सिम्पसनले ब्याटिङ गरिरहेका थियौं ।’

सुरुको १२–१३ बल खेल्दा गाह्रोँ भए पनि सिम्पसन जस्तो अनुभवी खेलाडीसँग खेल्दा सजिलो भएको इरसमसले सुनाए । इरसमसले सिम्पसन देव्रेहाते ब्याटर भएकाले पनि फाइदा मिलेको बताए । गत वर्ष गोर्खाजमा कुनै देव्रेहाते ब्याटर नभएको तथा यस पटक धेरै देव्रेहाते ब्याटर भएकाले पनि आफ्नो टोलीले राम्रो खेलिरहेको उनको अनुभव थियो । 

सिम्पसनले लगातार तीन जितपछि मनोबल बढेका जनाउँदै भरिभराउ दर्शकमाझ फाइनल खेल्ने इच्छा भएको सुनाए । यस विजयपछि गोर्खाज राम्रो स्थितिमा पुगेको र अन्तिम खेल जितेर शीर्ष दुई स्थानमा रहँदै क्वालिफायरमा स्थान बनाउन प्रयास रहने उनको दाबी थियो । 

आकाश त्रिपाठी ११ बलमा ८ रनमै आउट भए पनि काठमान्डुले पावर प्लेको पहिलो ६ ओभरमा ४६ रन जोडेको थियो । त्यसमा बेन चार्ल्सवर्थले कर्णालीका कप्तान सोमपाल कामीको एकै ओभरमा ३ छक्कासहित २० रन प्रहार गरे । चार्ल्सवर्थले २१ बल खेल्दै २ चौका र ३ छक्कासहित ३४ रन बनाए ।

मिलिन्द कुमार १५ रनमा रनआउट भएपछि गम्भीर संकटमा परेको समयमा इरसमस र सिम्पसनले खुलेर खेलेका थिए । कर्णालीका नन्दनले ४ ओभरमा ३५ रन खर्चेर ३ र पवन सर्राफले १ विकेट लिए । यसअघि गुलशन झाको आक्रामक इनिङ्सपछि टस जितेर ब्याटिङमा आएको कर्णालीले निर्धाििरत २० ओभरमा ७ विकेट गुमाई १ सय ४९ रन बनाएको थियो । 

कर्णालीले निकै दयनीय सुरुआत गरेको थियो । कप्तान करण केसीले खेलको पहिलो बलमै प्रियांक पाञ्चाललाई कट एन्ड बोल्ड गरेका थिए । सोही ओभरको अन्तिम बलमा विलियम बोसिस्टो १ रनमा रनआउट भए । मार्क वाट र पवनले तेस्रो विकेटमा ५९ रनको साझेदारी गरी कर्णालीको स्थिति सुधारेका थिए । वाट पनि ३० रनमा रनआउट भए । उनले २७ बलमा १ चौका र २ छक्का प्रहार गरे । पवनलाई ३५ रनमा सन्तोष यादवले एलबीडब्लू आउट गरे । पवनले २९ बलमा समान २ चौका र छक्का प्रहार गरे ।