काठमाडौँ — सुदूरपश्चिम रोयल्स नेपाल प्रिमियर लिग (एनपीएल) को प्लेअफ पुग्ने पहिलो टोली बनेको छ । सुदूरपश्चिमले शनिबार दोस्रो खेलमा डिफेन्डिङ च्याम्पियन जनकपुर बोल्ट्सलाई ६ विकेटले पराजित गर्‍यो । 

इशान पाण्डे र विनोद भण्डारीले संयमित इनिङ्स खेलेपछि सुदूरपश्चिमले कीर्तिपुरस्थित त्रिवि अन्तर्राष्ट्रिय क्रिकेट मैदानमा १ सय ४६ रनको लक्ष्य १४ बलअघि नै पुरा गरेको हो । 

सुदूरपश्चिम गत वर्ष जनकपुरसँगै फाइनलमा पराजित भएको थियो । तर, यसपालि उपाधिमाथि बलियो दाबेदारी प्रस्तुत गरेको सुदूरपश्चिम पहिलो पाँच खेल जितेर प्लेअफमा स्थान पक्का गर्दै क्वालिफायर १ नजिक पुगेको हो । त्यस विपरीत पहिलो चारै खेल हारेपछि जनकपुर बाहिरिने लगभग निश्चित जस्तै भएको छ ।

इशानले ३५ बल खेल्दै ५६ र विनोदले ४९ बल खेल्दै ४२ रन बनाए । इशानले ८ चौका र १ छक्का तथा विनोदले ३ चौका र १ छक्का प्रहार गरे । ओपनर जस ब्राउन खेलको पहिलो बल र क्रिस लिन १ रनमै आउट भएको अवस्थामा इशान र विनोदले ७५ बलमा ९१ रनको साझेदारी भूमिका निभाए । कप्तान दीपेन्द्रसिंह ऐरीले ७ बलमा १० र हरमित सिंहले १० बलमा अविजित २५ रन बनाएर सुदूरपश्चिमलाई जिताए । हरमितले १ चौका र ३ छक्का प्रहार गरे । जनकपुरका माज सदाकतले २, सञ्जय कृष्णमूर्ति र आदित्य महताले १–१ विकेट लिए । 

यसअघि अमेरिकी ब्याटर कृष्णमूर्तिको अर्धशतकप्रेरित जनकपुरले निर्धारित २० ओभर खेल्दै ८ विकेटमा १ सय ४५ रन बनाएको थियो । अन्तिम ८ ओभरमा ७८ रन जोड्दै जनकपुर यो स्कोरमा उभिन सफल भएको थियो । १२ ओभरभित्र ६७–४ को स्थितिमा रहेको जनकपुरको इनिङ्स तानेका कृष्णमूर्तिले ३८ बलमा ५० रन बनाए । उनले ४ चौका र २ छक्का प्रहार गरे । कृष्णमूर्तिले दीपेन्द्रले फालेको १५ औं ओभरमा २ छक्का र १ चौकासहित २० रन प्रहार गरे । उनले आदित्य महतासँग मिलेर पाँचौं विकेटमा ५५ रन जोडे । आदित्यले १३ बलमा २ चौकासहित १५ रन बनाएका थिए । 

अविनाश बोहराले १८ औं ओभरमा कृष्णमूर्ति र शुभ कंशाकारलाई लगातार बलमा आउट गरेर सुदूरपश्चिमलाई खेलमा फर्काएका थिए । अविनाशले उक्त ओभरमा २ रनमात्र दिए । दक्षिण अफ्रिकी अलराउन्डर वायन पार्नेल १२ बल खेल्दै १४ रनमा आउट भए । रुपेश सिंह १ रनमा अविजित रहे । अविनाशले सुदूरपश्चिमबाट ४ विकेट लिए । उनले ४ ओभरमा ३० रन खर्चे । अर्का तीव्र गतिका बलर स्कट कुग्लेइनले ४ ओभरमा २२ रन खर्चेर ३ र दीपेन्द्रले ३ ओभरमा ३० रन खर्चेर १ विकेट लिए । 

जनकपुरको सुरुआत राम्रो थिएन । कुग्लेइनले खेलको पहिलो ओभरमै आसिफ शेखलाई बोल्ड गरे । उनले नै मयन यादवलाई ६ रनमा एलबीडब्लू आउट गरे । ओपनर माज सदाकत ९ बलमा २ चौकासहित १२ रनमा दीपेन्द्रबाट बोल्ड भए । यान निकोल लफ्टी इटनले ३३ बलमा ३९ रन बनाए । उनले समान २ चौका र छक्का प्रहार गरे । 

एनपीएलमा पहिलो विदेशी कप्तान

दक्षिण अफ्रिकाका पूर्व अलराउन्डर वायन पार्नेल एनपीएलमा कप्तानी गर्ने पहिलो विदेशी खेलाडी बनेका छन् । अघिल्लो खेलमा मात्र उनी जनकपुर टालीमा समावेश भएका थिए । पोखरासँगको खेलमा अविजित अर्धशतक बनाएका थिए । एक समय दक्षिण अफ्रिकाको तीव्र बलिङको मुख्य आशा रहेका उनले सुदूरपश्चिमसँग भने बलिङ गरेनन् ।

जनकपुर पहिलो ३ खेलमा पराजित भएको थियो भने नियमित कप्तान अनिल साहको कमजोर फर्म रहेका कारण जनकपुरले पार्नेललाई कप्तानी दिने ‘बोल्ड’ निर्णय गरेको थियो । तर, पार्नेल आएर पनि जनकपुरको हारक्रम रोकिएन । टोली प्लेअफ दौडबाट बाहिरिने लगभग निश्चित जस्तै भएको छ । 

अनिल जनकपुरको प्लेयिङ टोलीमा पनि छैनन् । उनको स्थानमा आदित्यले खेलेका थिए । गत वर्ष जनकपुरले सुदूरपश्चिमलाई नै पराजित गरी उपाधि जितेको थियो । यस सिजनमा जनकपुरको प्रदर्शन निकै कमजोर रह्यो । टोलीले अघिल्लो खेलबाट गत सिजनका हिरो लाहिरू मिलान्थालाई प्लेयिङ टोलीबाट बाहिर राखेको थियो । आसिफ शेख जनकपुरका विकेटकिपर/ब्याटर मार्की खेलाडी हुन् । तर, उनलाई जनकपुरले यसपटक नेतृत्वदायी भूमिका दिएको छैन । गत सिजन अनिल अधिकांश समय घाइते हुँदा आसिफकै कप्तानीमा जनकपुरले उपाधि उचालेको थियो । 

लुम्बिनीको आशा कायमै

काठमाडौं– सन्दीप जोराले अन्तिम ओभरमा १० रन प्रहार गरेपछि लुम्बिनी लायन्सले पोखरा एभेन्जर्समाथि ३ विकेटको रोमाञ्चक जित हात पार्दै प्लेअफमा पुग्ने सम्भावना कायमै राखेको छ ।

१ सय ५१ रनको लक्ष्य पाएको लुम्बिनीलाई विजयनिम्ति अन्तिम ओभरमा १० रन चाहिन्थ्यो । पहिलो बलमा २ रन जोडेका जोराले त्यसपछि दोस्रो र चौथो बलमा चौका प्रहार गर्दै लुम्बिनीलाई रोमाञ्चक विजय दिलाए । पहिलो १३ बलमा ६ रनमात्र बनाउन सकेका जोराले २२ बलमा २ चौका र १ छक्कासहित अविजित २५ रन बटुलेपछि लुम्बिनीले २ बल अगाडि लक्ष्य पूरा गर्‍यो । ५ खेलमा लुम्बिनीको यो दोस्रो जित हो । पहिलो खेल जितेको लुम्बिनी त्यसपछि लगातार ३ खेल हार्दा अत्यधिक दबाबमा परेको थियो । पोखराको ४ खेलमा यो तेस्रो हार हो । 

लुम्बिनीको सुरुआत राम्रो थिएन । ओपनरद्वय सुमित महर्जन शून्य र डी’आरसी शर्ट ७ रनमै आउट भए । श्रीलंकाबाट खेलिसकेका निरोशन डिकवेलाको आगमनले लुम्बिनीको मध्यक्रम हौसिएको थियो । उनले २२ बल खेल्दै २–२ चौका र छक्कासहित ३७ रन बनाए । दिलीप नाथ १० रनमै आउट भए ।

कप्तान रोहित पौडेलले सर्वाधिक ४० रन बनाए । प्लेयर अफ द म्याच उनले ३६ बल खेल्दै ३ चौका र २ छक्का प्रहार गरे । गुलबदिन नैब ११ बलमा २ छक्कासहित १७ र रुबेन ट्रम्पलमन एक छक्कासहित ६ बलमा ९ रन बनाएर आउट भए । पोखराका विपिन खत्रीले ४ ओभरमा १८, म्याट टेलरले ३.४ ओभरमा र सागर ढकालले ३ ओभरमा समान २४ रन खर्चेर २–२ तथा जिम्मी निसमले १ विकेट लिएका थिए ।

यसअघि एडम रोसिङ्टन र निसमको सानदार ब्याटिङमा पोखराले निर्धारित २० ओभर खेल्दै ५ विकेट गुमाई १ सय ५० रन बनाएको थियो । ८ ओभरमा ३३ रन बनाउँदा ४ विकेट गुमाइसकेको अवस्थामा रोसिङ्टन र निसमले पाँचौं विकेटमा ६२ बलमा ९२ रनको साझेदारी गरे । सोही कारण पोखराले अन्तिम ५ ओभरमा ७६ रन जोडेको थियो । 

रोसिङ्टनले ६३ बल खेल्दा ७ चौका र ५ छक्कासहित ८१ रन बनाए । तिलकराज भण्डारीले उनलाई १९ औं ओभरमा आउट गरेका थिए । निसम ५१ रन बनाई अविजित रहे । उनले ३२ बल खेल्दै ३–३ चौका र छक्का प्रहार गरे । किरण ठगुन्ना १ रनमा अविजित रहे । ओपनर दिनेश खरेल ७ रन बनाई आउट भए । कप्तान कुशल भुर्तेल लगातार दोस्रो बलमा डकआउट भए । सुमित बर्मा पनि ५ बल खेलेर शून्यमै आउट भए । तृतराज दासले १ रनमात्रै जोड्न सके । लुम्बिनीबाट शेर मल्लले ४ ओभरमा २३ र तिलकले ४ ओभरमा २५ रन खर्चेर २–२ तथा नैबले ४ ओभरमा २० रन खर्चेर १ विकेट लिए ।