काठमाडौँ — नेपाल वादोरियो कराते डो संघअन्तर्गत गोकर्णेश्वर–८ स्थित सरस्वती डोजोले शुक्रबार आफ्नो डोजोका उत्कृष्ट खेलाडीलाई सम्मान गरेको छ ।

श्रीलंकामा सम्पन्न नवौं दक्षिण एसियाली कराते च्याम्पियनसिपमा स्वर्ण पदक जितेका खेलाडीलाई डोजोले १०–१० हजारसहित सम्मान गरेको हो । सरस्वती डोजोका खेलाडी सुस्मिता वाइबा र टीकामाया जिम्मीले स्वर्ण पदक जितेका थिए । एलन श्रेष्ठ र सुस्मिता वाइबाले तीन संस्करणमा लगातार स्वर्ण जित्दै ह्याट्रिक गरेका छन् ।

डोजोले १५ औं राष्ट्रपति रनिङ सिल्डमा स्वर्ण जितेका टिकामाया जिम्मी, कांस्य जितेका मिलन मगर तथा प्रथम युथ च्याम्पियनसिपका स्वर्ण जितेका नोर्बु तामाङलाई हौसलास्वरूप खेल सामग्री प्रदान गरिएको थियो ।

जोरपाटीको फेसन डिजायर पसलले डोजोका राष्ट्रिय तथा अन्तर्राष्ट्रिय पदकधारी खेलाडीलाई प्रोत्साहनस्वरूप ६ जोर ट्याकसुट प्रायोजन गरी हस्तान्तरण गरेको छ ।