काठमाडौँ — कप्तान अशोक धामी र दर्श सुनारले सातौं विकेटमा १ सय ८ रनको साझेदारी गरेपछि नेपालले एसीसी यू–१९ प्रिमियर कप क्रिकेटमा हङकङलाई २ सय ७१ रनको लक्ष्य दिएको छ । टस जितेर ब्याटिङ रोजेको नेपालले बिहीबार निर्धारित ५० ओभरमा ७ विकेट गुमाई २ सय ७० रन बनाएको हो ।

यूएईमा भइरहेको प्रतियोगितामा मध्यक्रममा अशोक र दर्शले राम्रो साझेदारी गरेपछि नेपालले हङकङलाई चुनौतीपूर्ण लक्ष्य दिएको थियो । अजमान स्थित सेभेन ड्रिस्ट्रिक ग्राउन्ड २ मा नेपालले अन्तिम ५ ओभरमा ६८ रन जोडेको थियो ।

अशोक इनिङ्सको अन्तिम बलमा ७३ रन बनाई आउट भए । उनले ५१ बल खेली ३ चौका र ४ छक्का प्रहार गरे । दर्श ५८ बलमा अविजित ४५ रन बनाए । उनले ३ चौका प्रहार गरे ।

ओपनरद्वय नीरजकुमार यादव २२ र वंश क्षेत्री २४ रनमा आउट भए । नीरजले २० बल खेली ३ चौका र वंशले ३४ बल खेली २ चौका प्रहार गरे । निश्चल क्षेत्री ३ रनमै आउट भए ।