काठमाडौँ — नेपाली महिला फुटबल टोली बुधबार इन्डोनेसियाविरुद्धको मैत्रीपूर्ण अन्तर्राष्ट्रिय खेलमा २–१ ले पराजित भएको छ ।

 योग्यकार्ताको मागुवोहर्जो रंगशालामा घरेलु टोलीले एक गोलले पछाडि रहेको स्थितिबाट खेल जितेको हो । नेपालले इन्डानेसियाको आत्मघाती गोलको मदतमा अग्रता लिएको थियो ।

अनिता बस्नेतको कर्नरमा विमला बिकले गरेको हेड प्रहारलाई इन्डानेसियाली डिफेन्डर भीभीले २० औं मिनेटमा आफ्नै पोस्टको दिशा दिएकी थिइन् । इन्डानेसियाली कप्तान गेय युमान्डाले ५८ औं मिनेटमा बराबरी गोल फर्काइन् । निर्णायक गोल भने ६७ औं मिनेटमा सम्भव भयो । उया अलले गोल गरेकी हुन् ।

नेपालले प्रमुख खेलाडी सावित्रा भण्डारीविना खेलेको थियो । चोटग्रस्त सावित्राविना नेपालले सटिक आक्रमण बुन्न सकेन । अब नेपालले थ्री नेसन्स कपको अर्को खेलमा मंगलबार चाइनिज ताइपेईको सामना गर्नेछ ।