काठमाडौँ — लुम्बिनी लायन्स गत सिजन नेपाल प्रिमियर लिग (एनपीएल) को पुछारमा थियो । टोलीले लिग चरणका ७ मध्ये १ खेलमात्र जितेको थियो । त्यो एउटै जित लुम्बिनीले चितवन राइनोजविरुद्ध पाएको थियो । 

यस सिजनको एनपीएलमा बिहीबारको खेलमा पनि लुम्बिनीले त्यसैलाई निरन्तरता दियो । रोहित पौडेल र गुलबद्दिन नैबले चौथो विकेटमा ४१ बलभित्र ६० रनको साझेदारी गरेपछि लुम्बिनीले चितवनलाई ६ विकेटले पराजित गर्‍यो । चितवन त्यही टोली हो, जसले पहिलो खेलमा कर्णाली याक्सलाई ४ विकेटले पराजित गरेर आफ्नो दाबेदारिता प्रस्तुत गरेको थियो । 

लुम्बिनीले त्रिवि अन्तर्राष्ट्रिय क्रिकेट मैदानमा १ सय ४३ रनको लक्ष्य ९ बलअगाडि १ सय ४६ रन बनाउँदै पूरा गर्यो । लुम्बिनीले आफ्नो पहिलो खेलमै जित हात पारेको हो । 

रोहितले ४४ बल खेल्दै १ चौका प्रहार गरी ३९ रन बनाए । नैबले ४४ रनको अविजित इनिङ्स खेले । उनले २४ बल खेल्दै समान ३ चौका र छककासहित ४४ रन बनाए । जेजे स्मिट ४ रनमा अविजित रहे । उनले चौका प्रहार गर्दै विजयी रन बटुलेका थिए । चितवनका रिजन ढकालले ३ ओभरमा १७ रन खर्चेर २ र सोहेल तनवीरले १ विकेट लिए । 

रिजनले लुम्बिनीका दुवै ओपनरलाई आउट गरेका हुन् । डी’आर शट समान १ छक्का र चौका प्रहार गर्दै ११ र सन्दीप जोरा १८ बलमा ४ चौका प्रहार गर्दै २८ रनमा आउट भए । दिलीप नाथ तेस्रो रन लिने प्रयासमा १० रनमै रनआउट हुन पुगे ।

‘पहिलो विजय निकै महत्त्वपूर्ण हुन्छ, कुनै पनि प्रतियोगितामा पहिलो खेल जित्दा त्यो प्रतियोगिता नै एकदमै राम्रो हुन्छ जस्तो लाग्छ । त्यसैले आजको खेल हामीलाई एकदमै महत्त्ववूर्ण थियो,’ लुम्बिनीका कप्तान रोहितले भने, ‘यो नतिजा हाम्रो टिम प्रयासमा सम्भव भएको हो । सबैको राम्रो प्रयासमा नै जित निकाल्न सफल भयौं । 

फ्लडलाइटमा चितवनलाई १ सय ४२ रनमै रोकेर हामीले विजय आधार तयार पारेका थियौं ।’ यसअघि रवि बोपाराले लगातार दोस्रो खेलमा अर्धशतक बनाएपछि टस हारेर ब्याटिङमा आएको चितवनले निर्धारित २० ओभरमा ७ विकेट गुमाई १ सय ४२ रन बनाएको थियो । बोपाराले ५५ बलमा ६६ रन बनाई चितवनको इनिङ्स तानेका थिए । उनले ४ चौका र ३ छक्का प्रहार गरे । बोपारालाई अन्तिम ओभरमा गुलबद्दिन नैबले दिलीप नाथबाट क्याच गराए । 

चितवनको सुरुआत राम्रो थिएन । पहिलो ओभरमै रुबेन ट्रम्पलमनले डेबिड मलानलाई शून्यमै बोल्ड गरे । देव्रेहाते स्पिनर अभिषेक गौतमले दीपक बोहरालाई १० र देव खनाललाई १४ रनमा आउट गरेपछि चितवन आठौं ओभरमा ४१–३ को स्थितिमा पुग्यो ।