कास्की — भदौ २३ र २४ को आन्दोलनका कारण स्थगित वात्सल्य एभरेस्ट महिला भलिबल लिगका बाँकी खेल कात्तिक २६ देखि हुने भएको छ । आयोजक इन्फिनिटी ड्रिम्स प्रालिले बाँकी ७ खेल कात्तिक २६ देखि २९ सम्म गरिने मंगलबार विज्ञप्तिमार्फत जानकारी दिएको हो । 

लिगको निरन्तरताका लागि आयोजकले नेपाल भलिबल संघसँग स्वीकृति लिइसकेको छ । लिगका बाँकी खेल काठमाडौंमा हुने विज्ञप्तिमा उल्लेख छ । बाँकी खेल सम्पन्न गर्ने तयारी तीव्र गतिमा अगाडि बढिरहेको र संशोधित खेल तालिका चाँडै सार्वजनिक गरिने आयोजकले जनाएको छ ।

यसअघि लिगका ९ खेल पोखरा रंगशालास्थित बहुउद्देश्यीय कभर्ड हलमा भएका थिए । जेन–जी आन्दोलनको दोस्रो दिन भदौ २४ का दुई खेल स्थगित गरेको आयोजकले पछि पूरै लिग नै स्थगित गरेको थियो । 

लिगमा ६ फ्रेन्चाइच टिम सहभागी छन् । कर्णाली यश्विस, पोखरा निन्जाज, ललितपुर क्विन्स, काठमाडौं स्पाइकर्स, मधेश युनाइटेड र लुम्बिनी लाभाज उपाधि दाबेदार थिए । 

लिगको चौंथो दिनको खेल सकिँदा फाइनल खेल्ने दुई टिमको लगभग टुंगो लागिसकेको थियो । लिगमा ३–३ खेल खेलेका कर्णाली र ललितपुर शीर्ष दुईमा थिए । खेलेका सबै खेल जितेर ९ अंक जोड्दा यी दुई टिमको फाइनल यात्रा पक्काजस्तै थियो ।