काठमाडौँ — पहिलो पटक नेपाली मिडियाको सामना गर्दा म्याट रसले नेपाली फुटबललाई अर्कै स्तरमा पुर्‍याउने दाबी गरेका थिए । तर, उनी एक वर्ष पनि टिकेनन् । सायद सात महिना पुग्दा नपुग्दै हरेस खाए । जतिले उनलाई पछिल्लो समय नजिकबाट हेर्ने मौका पाए । सबैको एउटै धारणा थियो, उनी दिनदिनै निराश हुँदै गइरहेका छन् । यो सबै खराब स्थिति उनको अनुहारमै झल्किन थालेको थियो । 

यी अस्ट्रेलियाली प्रशिक्षकले नेपाली राष्ट्रिय पुरुष फुटबल टिमको जिम्मेवारीबाट राजीनामा दिएको बिहीबार औपचारिक रूपमा बाहिर आयो । भलै उनले तीन दिन अघि नै आफ्नो राजीनामा अखिल नेपाल फुटबल संघ (एन्फा) लाई पठाइसकेका थिए । एन्फा स्रोतका अनुसार व्यक्तिगत कारणले उनी जर्मनीमा छन् । मूल प्रश्न उनले किन मुख्य प्रशिक्षकको पदबाट राजीनामा दिए त ? 

सायद यसको पनि ठ्याक्कै उत्तर आउने छैन । जतिबेलासम्म उनी आफैंले प्रतिक्रिया दिने छैनन् । तर राजीनामाको केही कारण भने सजिलै अनुमान गर्न सकिन्छ । उनै नजिक रहेर काम गरेकाहरूको विश्वास गर्ने हो भने । पहिलो कारण थियो, उनले आफ्नो सहायकका रूपमा नियुक्त गरेका लिन्डे डेविड हेन्डरसनलाई टिमबाट हटाउनु । उनले अनौपचारिक रूपमै टेक्निकल एनालिस्ट लिन्डे आफ्नो टिममा हुनुपर्ने भन्दै आएका थिए । तर, एन्फाले उनलाई टिममा निरन्तरता दिएन । 

लिन्डेको स्थानमा पछिल्लो समय सल्याण खड्गीले रसको सहायक भएर काम गरेका थिए । दोस्रो कारण, प्रमुख प्रशिक्षकका रूपमा उनीसामु खेलाडी चयन गर्ने कुनै माध्यम नै नहुनु । बंगलादेशविरुद्ध दशरथ रंगशालामा भएको मैत्रीपूर्ण खेलपछि उनले लिग नभएको दुई वर्षभन्दा बढी भइरहेको स्थितिमा खेलाडीले यति खेल्नु पनि ठूलै भएको बताएका थिए ।