काठमाडौँ — अमेरिकाले विश्वकप लिग २ क्रिकेटमा लगातार दोस्रो विजय हात पारेको छ । नेपालका पूर्व प्रशिक्षक पुबुदु दासानायकेको प्रशिक्षणमा रहेको अमेरिकाले दुबईमा मंगलबार घरेलु टोली यूएईलाई ४ विकेटले हरायो ।

मिलिन्द कुमारले लगातार दोस्रो खेलमा पनि अर्धशतक बनाएपछि अमेरिकाले २ सय १२ रनको लक्ष्य ५ बलअघि २ सय १३ रन बनाई पूरा गरेको थियो । अमेरिका २२ खेलमा ३२ अंक जोड्दै शीर्षस्थानमा छ भने 

यूएई ६ अंकसहित पुछारमा छ । यूएईले १७ मध्ये १४ खेलमा पराजय भोगिसकेको छ । मिलिन्दले ८१ बलमा ४ चौका र १ छक्कासहित ७१ रन बनाए । नेपालविरुद्धको खेलमा पनि उनले ५० बलमा अविजित ७० रन बनाएका थिए । तर यूएईसँगको खेलमा प्लेयर अफ द म्याच शुभम रन्जने चुनिए । उनले ८१ बलमा ४ चौकासहित अविजित ४६ रन बनाउनुका साथै २ विकेट लिए । कप्तान मोनांक पटेलले ६७ बलमा ५ चौकासहित ५० रन बनाए ।