काठमाडौँ — फुटबलर सावित्रा भण्डारीको अनेक कथा बुन्न सकिन्छ । उनलाई कसैले ‘साम्बा’ भन्दा खुसी नै लाग्छ । उनका अनेक कथामध्ये सबैभन्दा बेजोड हुने त गोलको कथा न हो । त्यसैले साम्बाको गोल कथा सबैभन्दा रूचिकर हुने निश्चित छ ।

उनले कति गोल गरेकी छन् भन्दा त्यसको हिसाबकिताब कहिलेकाहीं गाह्रै हुने गर्छ । यदि उनी ‘गोलमेसिन’ हुन् भने यस्तो हुनुमा फेरि के नै आश्चर्य छ र ? 

सिलोङमा भएको थ्री नेसन्स कपमा सोमबार सावित्राले आयोजक भारतविरुद्ध दुई गोल गरिन् । त्यसकै सहयोगमा नेपाली टिम भारतीय भूमिमै सानदार २–१ को जित रच्न सफल भयो ।

इरानसँगको अलिकति निराशाजनक प्रदर्शनपछि भारतमाथिको जितले नेपाली फुटबलमा फेरि उत्साह थपेको छ । भारत अहिले त्यो टिम हो, जुन एसिया कपमा छनोट भएको छ । साम्बासँग जोडिएका गोल हिसाबकिताबको १० तथ्य :

कुल गोलसंख्या ६८

सबैभन्दा महत्त्वपूर्ण प्रश्न हो, सावित्राको कुल गोलसंख्या कति पुग्यो त ? यसको ठ्याक्कै उत्तर हो, ६८ । पुरुष होस् वा महिलाको खेल, अन्तर्राष्ट्रिय फुटबलमा उनी नै सर्वाधिक गोल गर्ने खेलाडी हुन् । उनले गोलको त्यो उचाइ छोएको छ, जुन सम्भवतः अब अरूका लागि छोइनसक्नु हुनेछ । अनि फेरि अबका दिनमा उनी आफैंले पनि यो गोलको आँकडा बढाउने छन् । 

सबैभन्दा छिटो गोल

भारतविरुद्धको त्यही खेलमा प्राप्त जितमा सावित्राले दोस्रो मिनेटमै गोल गरिन् । नेपालका लागि उनले गरेको पहिलो गोल सुरुमै सम्भव भएको थियो । नेपालका लागि सम्भव यो नै सबैभन्दा छिटो गोल हो त ? सायद । धेरै हदसम्म । हामीसँग यसको ठ्याक्कै तथ्यांक छैन । तर सावित्राले भने अहिलेसम्म जति गोल गरिन्, त्यसमा सबैभन्दा कम समयमा उनले गरेको गोल यो नै हो । 

१८ देशविरुद्ध गोल

सावित्राले अहिलेसम्म गरेका गोल १८ फरक–फरक प्रतिद्वन्द्वी देशविरुद्ध छ । यो पनि आफैंमा कीर्तिमान हुनसक्छ । ती देश कुन–कुन हुन् त ? यसको सूची पनि रमाइलै हुन्छ । यी भुटान, श्रीलंका, मलेसिया, माल्दिभ्स, भारत, म्यानमार, इरान, बंगलादेश, इन्डोनेसिया, किर्गिस्तान, ताजकिस्तान, उज्वेकिस्तान, भियतनाम, सिरिया, इराक, प्यालेस्टाइन, लेवनान र लाओस । 

भुटानविरुद्ध सबैभन्दा बढी गोल

यी १८ देशमध्ये भुटान त्यस्तो प्रतिद्वन्द्वी हो, जोविरुद्ध सावित्राले सबैभन्दा बढी गोल गरेकी छन् । यसले छोएको संख्या हो, १० । त्यसपछि उनले भारतविरुद्ध ९, माल्दिभ्सविरुद्ध ८, श्रीलंकाविरुद्ध ७ गोल, इराकविरुद्ध ५ गोल गरेकी छन् । किर्गिस्तान, उज्वेकिस्तान, लाओसविरुद्ध समान ४ गोल गरेकी छन् । सबैलाई के पनि थाहा छ भने यसमध्ये सावित्रालाई मनपरेको गोल भनेको भारतविरुद्ध नै हो । 

३५ खेलमा गोल

अब अर्को उत्तिकै महत्त्वपूर्ण तथ्यांक । सावित्राले नेपालका लागि खेलेको खेलसंख्या ५९ पुगेको छ । त्यसमध्ये ३५ खेलमा उनले गोल गरेकी छन् । त्यसको अर्थ उनले आफूले खेलेका ६० प्रतिशत खेलमा गोल गरेकी छन् । अर्को अर्थमा उनको प्रत्येक खेलमा गोल औसत १.१५ छ । यो त असाध्यै उच्च हो । यसले पक्कै देखाउँछ, उनी ‘गोलमेसिन’ नै हुन् भनेर । 

 एक चौथाइ गोल उनकै

नेपालले महिलाको अन्तर्राष्ट्रिय फुटबल खेल्न थालेको सन् १९८६ देखि हो । भारतविरुद्धको पछिल्लो भिडन्त नेपालले खेलेको १०४ औं अन्तर्राष्ट्रिय खेल हो । यसमा अहिलेसम्म कुल २ सय ५९ गोल भएको छ । त्यसमध्ये सावित्राको ६८ गोल हो । यस अर्थमा नेपालबाट सम्भव जति पनि अन्तर्राष्ट्रिय गोल छन्, त्यसमध्ये एक चौथाइ त सावित्राकै नाममा छ । यो अर्को ठूलो उपलब्धि हो । 

भुटानविरुद्ध पहिलो गोल

सावित्राले गरेको पहिलो गोल भुटानविरुद्ध नै छ । त्यो सन् २०१४ को तेस्रो साफ च्याम्पियनसिपमा हो । त्यो प्रतियोगिता पाकिस्तानको इस्लामाबादमा भएको थियो । उनी त्यस खेलमा सब्स्टिच्युट खेलाडीका रूपमा मैदान छिरेकी थिइन् । त्यसको एकै क्षणमा गोल गर्न पनि सफल रहिन् । उनको त्यो पहिलो ऐतिहासिक गोलको ठ्याक्कै समय ८८ औं मिनेट थियो । 

एकै खेलमा ६ गोल

एकै खेलमा सावित्राले गरेको सबैभन्दा बढी गोल भनेको ६ हो । यो भुटानविरुद्ध नै सम्भव भएको थियो । त्यो प्रतियोगिता भने सन् २०१६ को चौथो साफ च्याम्पियनसिप थियो । यो आयोजना भएको थियो भारतको सिलिगुढीमा । नेपाल त्यसमा ८–० ले विजयी भएको थियो । अब प्रश्न हुनसक्छ, ती प्रत्येक गोलको समय कति होला ? यसको जवाफ ५, ९, २३, ३५, ७२ र ७७ औं मिनेट । सावित्राको पहिलो ह्याट्रिक पनि यही हो । 

अन्य गोल वर्षा

सावित्राले एकै खेलमा धेरै गोल गरेको यो नै एकमात्र उदाहरण पनि होइन । उनले माल्दिभ्सविरुद्ध ५, इराकविरुद्ध ५, किर्गिस्तानविरुद्ध ४, लाओसविरुद्ध ४ गोल गरेकी छन् । भुटानविरुद्धको ६ गोलको प्रदर्शनलाई एकै ह्याट्रिक मान्ने हो भने त्यसलाई समेत जोडेर अहिलेसम्म उनले सातपल्ट तीन वा त्यो भन्दा बढी गोलको उपलब्धिी हासिल गरेकी छन् । त्यसमध्ये दुई ह्याट्रिक माल्दिभ्सविरुद्ध छ । 

सय गोलको लक्ष्यमा

सावित्रालाई अब एउटा प्रश्न सोध्ने बेला आएको छ । के उनमा १०० गोल गर्ने लक्ष्य छिन् त ? सम्भवतः उनले भन्ने छिन्, व्यक्तिगत गोलभन्दा टिमको सफलता नै ठूलो हो । तर उनको मनको कुनै कुनामा सय गोलको उपलब्धि छुने लोभ त होला नै ।