विराटले आफ्नो इनिङ्स दौरान श्रीलंकाका कुमार सांगाकारालाई उछिनेर एकदिवसीय अन्तर्राष्ट्रिय सर्वाधिक रन बनाउने सूचीमा दोस्रो स्थानमा उक्लेका छन् ।
What you should know
सिड्नी — रोहित शर्मा र विराट कोहलीले दोस्रो विकेटका लागि अविजित १ सय ६८ रनको साझेदारी गर्दै ब्याटबाट उत्तर दिएपछि भारतले तेस्रो तथा अन्तिम एकदिवसीय अन्तर्राष्ट्रियमा शनिबार अस्ट्रेलियालाई ९ विकेटले पराजित गरेको छ ।
जितनिम्ति २ सय ३७ रनको सामान्य लक्ष्य पाएको भारतले सिड्नी क्रिकेट मैदानमा ६९ बल बाँकी छँदै जित आत्मसात् गरेको थियो । त्यसमा रोहितले सर्वाधिक १ सय २१ रन बनाए । यसअघि दुई खेलमा लगातार शून्यमा आउट भएका विराटले आकर्षक ७४ रन बनाए । एडिलेड र पर्थमा भएका पहिलो दुई खेलमा विजय हात पारेसँगै अस्ट्रेलियाले यसअघि नै तीन खेलको शृंखला जितिसकेको थियो ।
रोहित र विराट दुवैले टेस्ट र ट्वान्टी–२० क्रिकेटबाट संन्यास लिइसकेका छन् । उनीहरूको ध्यान अबको विश्वकपमा छ । दुवैका लागि यो नै अस्ट्रेलियाली भूमिमा अन्तिम खेल रहन सक्नेछ । ‘मलाई के थाहा छ भने हामी फेरि दोहोर्याएर यहाँ खेल्न आउने छौं वा छैनौं,’ ३८ वर्षीय रोहितले भने, ‘हामीसँग अस्ट्रेलियामा खेलेका राम्रा अनुभव छन्, खराब अनुभव पनि छन् । तर जति यहाँ खेलें, ती सबैमा राम्रै खेल्ने प्रयास गरें ।’
अस्ट्रेलियाली कप्तान मिचेल मार्सले टस जितेर पहिले ब्याटिङको निर्णय गरे लगत्तै खेल भारतको पक्षमा मोडिएको थियो । यसले अन्ततः दिशा परिवर्तन गरेन । पूरा अस्ट्रेलियाली टिम ४६.४ ओभरमा २ सय ३६ रनमात्र बनाएर अलआउट भयो । भारतका लागि हर्षित राणाले ४ विकेट लिए । त्यसको जवाफमा रोहितले शुभमन गिलसँग पहिलो विकेटका लागि ६९ रन जोडे । भारतीय कप्तान गिल २४ रन बनाएर जोस हेजलउडको सिकार बने । त्यसपछि विराट क्रिजमा आए र उनले रोहितसँग मिलेर आक्रमण ब्याटिङ गरे ।
रोहितले आफ्नो ३३ औं एकदिवसीय अन्तर्राष्ट्रिय शतक पूरा गरे । त्यसमा १४ चौका र ३ छक्का प्रहार गरे । विराटले भने व्यक्तिगत ७५ औं एकदिवसीय अन्तर्राष्ट्रिय अर्धशतक बनाए । विराटले आफ्नो इनिङ्स दौरान श्रीलंकाका कुमार सांगाकारालाई उछिनेर एकदिवसीय अन्तर्राष्ट्रिय सर्वाधिक रन बनाउने सूचीमा दोस्रो स्थानमा उक्लेका छन् । विराटले ३ सय ५ एकदिवसीय खेलमा १४ हजार २ सय ५५ रन बनाइसकेका छन् । उनी भारतकै सचिन तेन्दुलकरभन्दा मात्र पछि छन् ।
विराटले खेलपछि भने, ‘जुन स्थितिमा हामीले ब्याटिङ अवसर पायौं, स्ट्राइक फेरेर रन बनायौं । हामीलाई एकअर्काको खेल राम्रोसँग थाहा छ । हामी सबैलाई धन्यवाद दिन चाहन्छौं, हामीलाई अस्ट्रेलियामा आएर खेल्नु राम्रो लाग्छ । हामीले अस्ट्रेलियामा केही उत्कृष्ट क्रिकेट खेलेका छौं ।’
