काठमाडौँ — मिलिन्द कुमारले खेलको अन्त्यमा आक्रामक अर्धशतक बनाएपछि अमेरिकाले विश्वकप लिग २ क्रिकेटमा आइतबार नेपाललाई २ सय ६३ रनको लक्ष्य दिएको छ ।

नेपालले टस जितेपछि ब्याटिङको निम्तो पाएको अमेरिकाले दुबई अन्तर्राष्ट्रिय क्रिकेट रंगशालामा निर्धारित ५० ओभर खेली ६ विकेट गुमाई २ सय ६२ रन बनाएको हो । लिग २ को यात्रामा सानदार प्रदर्शन गर्दै आएका मिलिन्दले ५० बलमा अविजित ७० रन बनाए । जसको कारण अमेरिकाले अन्तिम ५ ओभरमा ५१ रन बनाएको थियो । मिलिन्दले ६ चौका र २ छक्का प्रहार गरे । उनीसँगै अविजित रहेका हर्मित सिंहले ६ बलमा २ छक्कासहित अविजित १६ रन बनाए ।

यसअघि आन्द्रेज गाउस र स्मित पटेलले अमेरिकालाई संयम सुरुआत दिलाउन खोजेका थिए । गाउस २९ बलमा ११ रन बनाई ८ औं ओभरमा आउट भए, जतिखेर अमेरिकाको कुल स्कोर १७ रन थियो । कप्तान मोनाक पटेललाई आरिफ शेखले १० रनमा एलबीडब्लू आउट गरे ।