काठमाडौँ — अखिल नेपाल फुटबल संघ (एन्फा) का केही प्रमुख पदाधिकारीले सोमबार नेपाली फुटबलको सर्वोच्च संस्थामा गम्भीर असन्तुष्टि जनाउँदै ‘अर्ली इलेक्सन’ को माग राखेका छन् । एन्फा नेतृत्वप्रति उनीहरूको आरोप हो, संवेदनशील घटनामा उदासीनता, सरोकारवालाको बेवास्ता, लिग सञ्चालनमा उदासीनता, अन्तर्राष्ट्रिय खेल सञ्चालनमा असफलता, अपारदर्शी आर्थिक गतिविधि र खेलाडी प्रोत्साहनमा कमी भएको छ ।

वरिष्ठ उपाध्यक्ष वीरबहादुर खड्का, उपाध्यक्ष विराटजंग शाही तथा सदस्यद्वय रविन चन्द र रुपेश अधिकारीले पत्रकार सम्मेलन गर्दै नेपाली फुटबल ठूलो दुर्घटनातर्फ अग्रसर रहेको दाबी गरे । उनीहरूले भनेका छन्, ‘वर्तमान एन्फा नेतृत्वले देखाएको कार्यशैलीप्रति हामी गम्भीर रूपमा निरास छौं । हाम्रा गुनासोप्रति सुनवाइ भइरहेको छैन । त्यसैले हामीले आफ्ना असन्तुष्टि सार्वजनिक गरेका छौं ।’

‘पंकजविक्रम नेम्वाङले अध्यक्षका रूपमा काम गर्न सक्नु भएको छैन्, त्यसैले उहाँले राजीनामा दिनु पर्छ । हामीले पनि केही गर्न सकेनौं भने राजीनामा दिन्छौं । यस्तो भयो भने चाँडै निर्वाचन हुनेछ र त्यसबाट नयाँ नेतृत्व आउने छ,’ वरिष्ठ उपाध्यक्ष खड्काले भने, ‘एन्फाको मुख्य दायित्व भनेकै लिग नियमित सञ्चालन गर्नु हो, तर यस विषयमा नेतृत्वले चासो देखाएको छैन् ।’