लन्डन — युरोपेली विश्वकप फुटबल छनोटमा नर्वेका लागि इर्लिङ हालान्डले शनिबार इजरायलविरुद्ध ह्याट्रिक गरे । यसै क्रममा उनको अन्तर्राष्ट्रिय फुटबलमा ५० गोल पूरा भएको छ । उनले पेलेको तुलनामा कम खेल खेल्दै यति धेरै गोल गरेका हुन् । हालान्डको खेल जीवनको तथ्यांक विश्लेषण गर्ने हो भने उनी अरू ठूलो नाम मानिएका खेलाडी अगाडि उनको प्रदर्शन उच्च रहेको छ ।

म्यानचेस्टर सिटीका लागि उनले यो सिजन नौ गोल गरिसकेका छन् । इजरायलविरुद्ध उनको दोस्रो गोल नै ५० औं थियो । त्यस अर्थमा ४६ खेल खेलेर उनले नर्वेका लागि ५१ गोल गरिसकेका छन् । यसै क्रममा उनी ५० गोलका लागि ५० भन्दा कम खेल्ने छैटौं पुरुष खेलाडी पनि भएका छन् । अझ सबैभन्दा महत्त्वको तथ्यांक के रहेको छ भने ५३ वर्षयता उनी यस्तो उपलब्धि चुम्ने पहिलो खेलाडी हुन् ।

अब उनी सबैभन्दा चाँडै ५० गोल गर्ने खेलाडी सूचीको पाँचौं स्थानमा उक्लेका छन् । पेलेले ५० गोलका लागि ४९ अन्तर्राष्ट्रिय खेल खेलेका थिए । उमेर र खेलका आधारमा हालान्डको प्रदर्शन क्रिस्टियानो रोनाल्डो र लियोनल मेसीको तुलनामा अझ धेरै उच्च रहेको छ । रोनाल्डोले पोर्चुगलका लागि ४६ खेल खेलेर १७ गोल गरेका थिए भने मेसीले यत्तिकै खेलमा अर्जेन्टिनाका लागि १३ गोल मात्र गरेका थिए ।

हालान्डको खुलेर प्रशंसा गर्दै साथी खेलाडी एलेक्जान्डर सोरलोथले भनेका छन्, ‘तपाईंलाई लाग्दो हो, हालान्डको खेल पनि हेरियो । तर होइन, उनको प्रदर्शनमा अझ धेरै सुधार आइरहेको छ । मलाई लाग्छ, उनले गर्न नसक्ने भनेको केही पनि छैन । उनको खेलसँग जोडिएका तथ्यांक साँच्चै अविश्वसनीय छन् ।’ नर्वेका सहायक प्रशिक्षक केन्ट बेरेगेसेनले पनि भनेका छन्, ‘हालान्डको खेल शब्दले बयान गर्न सकिन्न ।’