काठमाडौँ — सहिद स्मारक लिग ‘ए’ डिभिजनका नौ क्लबले शनिबार प्रेस सम्मेलन गर्दै भनेको छ, अबको प्रतियोगिता गर्दा त्यसमा शृंखलाबद्ध धेरै सुधारको आवश्यकता हुनेछ, लिगकै संरचनादेखि व्यवस्थापनसम्म । ती क्लबको सबैभन्दा महत्त्वपूर्ण माग हो, लिगको सञ्चालनका लागि स्वतन्त्र कमिटी ।

त्यो पनि एसियाली फुटबल महासंघ (एएफसी) सँग समन्वय गरेर पूर्ण अधिकारसहित । अहिलेसम्म माथिल्लो डिभिजनको लिग नभएको साढे दुई वर्ष भइसकेको मात्र नभएर यस वर्ष पनि हुने नहुने अनिश्चितताबीच यी क्लब मिडियासामु आएका हुन् । क्लबहरूको दाबी हो, अधिकांश देशमा लिग सञ्चालन यसरी नै स्वतन्त्र कमिटीले गर्ने गर्छ । नेपालमा पनि यस्तो कमिटी गठन गरे यसले प्रतियोगिता नियमित र व्यवस्थित ढंगले गर्ने, खेलको नियम र कानुन पूर्ण रूपमा कार्यान्वयन गर्नेदेखि लिएर खेल मिलोमतो र गलत आर्थिक चलखेल रोक्ने जिम्मेवारी हुने पनि बताएको छ ।

अखिल नेपाल फुटबल संघ (एन्फा) का पूर्वअध्यक्ष कर्माछिरिङ शेर्पाको अगुवाइमा क्लबहरू अगाडि आएका हुन् । एन्फाले लिगबारे छलफल गर्न बैठक बोलाएको मितिको एक दिन अगाडि यी क्लबले सार्वजनिक रूपमा आफ्नो धारणा अगाडि सारेका हुन् ।