काठमाडौँ — नेपाल र जापान अहिले केही बेरमा ट्वान्टी–२० विश्वकप एसिया–इष्ट एसिया प्यासिफिक छनोटको निर्णायक खेलमा खेल्दै छन् । यी दुई टोली यसअघि नै सुपर सिक्समा प्रवेश गरेर ट्वान्टी–२० विश्वकपमा पुग्ने यात्रा छोट्याइसकेका छन् ।

नेपालले समूह ‘बी’ को पहिलो खेलमा बुधबार कुवेतलाई ५८ रनले पराजित गरेको थियो । जापानले बिहीबार कुवेतलाई ५ विकेट गरेको थियो । जसको कारण नेपाल र जापान दोस्रो चरणमा पुगेका थिए भने कुवेत समूह चरणबाटै बाहिरिएको थियो ।

नेपाल र जापान बीचको खेलको विजेता समूहको विजेता मात्र हुनेछैन, विजेता टोलीसँग सुपर सिक्समा अतिरिक्त २ अंक हुनेछ । नेपालले जापानसँग २५ वर्षपछि खेल्न लागेको हो । जापानले सुरुआती क्रिकेट एसियाली क्रिकेट परिषद् (एसीसी) अन्तर्गत रहेर खेलेको थियो, जसको कारण नेपालसँग नियमित भेट हुन्थ्यो ।

सन् २००० मा यूएईमा भएको एसीसी ट्रफीपछि जापान एसीसीबाट अलग भएर इष्ट एसिया प्यासिफिकमा खेल्न लाग्यो । २०२३ मा पपुवा न्यु गिनी इष्ट एसिया प्यासिफिकको विजेता भएर अमेरिका र वेस्ट इन्डिजमा गएर ट्वान्टी–२० विश्वकप खेलेको थियो । सोही कारण पपुवा न्यु गिनीले यस पटक एसिया र इष्ट एसिया प्यासिफिक क्षेत्रको छनोट खेल्नु परेन ।

जापानले त्यसको फाइदा उठाउँदै इष्ट एसिया प्यासिफिक ‘बी’ क्षेत्रको छनोटको विजेता भएर ओमान पुगेको हो । दक्षिण कोरियामा गत वर्ष नै भएको ४ राष्ट्र सम्मिलित छनोटमा जापानले डबल राउन्ड रोबिनको सबै ६ खेल जितेको थियो । तर अन्तर्राष्ट्रिय क्रिकेट परिषद् (आईसीसी) ले एसिया र इष्ट एसिया प्यासिफिक क्षेत्रलाई एकै ठाउँ गाभेपछि नेपालले जापानसँगको क्रिकेट सम्बन्धलाई नवीकरण गर्ने अवसर पाएको छ ।

२००८ मा जर्सीमा भएको विश्व क्रिकेट लिग डिभिजन ५ मा जापान र नेपाल एकै साथ खेलेका थिए । तर फरक समूहमा रहेका थिए । जापान समूह चरणबाटै बाहिरियो भने नेपाल सेमिफाइनलमा पुगेर रोकियो । २०१९ यता दुई राष्ट्र बीचको खेललाई आईसीसीले ट्वान्टी–२० अन्तर्राष्ट्रिय मान्यता दिएका कारण जापान र नेपाल एकै हैसियतमा छन् । तर नेपालसँग २०१८ यता एकदिवसीय अन्तर्राष्ट्रिय मान्यता पनि रहेको छ ।

एक समयका नियमित प्रतिद्वन्द्वी नेपाल र जापान अन्तर्राष्ट्रिय क्रिकेटमा २५ वर्षपछि भेट्न लागेका हुन् । नेपाल राष्ट्रिय क्रिकेट पुरुष टोलीले विगतमा जापानसँग खेलेका खेलहरू यस प्रकारका छन् ।

नेपालको पहिलो अन्तर्राष्ट्रिय जित

१९९६, मलेसिया

नेपालले पहिलो अन्तर्राष्ट्रिय प्रतियोगिताको रूपमा मलेसियामा भएको पहिलो एसीसी ट्रफीमा सहभागिता जनाएको थियो । पहिलो खेलमा बंगलादेशसँग नेट रन रेटका आधारमा पराजित भएपछि नेपालको दोस्रो भेट जापानसँग भएको थियो । जापानको पनि यो पहिलो अन्तर्राष्ट्रिय सहभागिता थियो । जापान पनि पहिलो खेलमा ब्रुनाईसँग पराजित भएर नेपालसँगको खेलमा उभिएको थियो ।

पहिलो एसीसी ट्रफीको अफिसियल डिनरमा प्लेयर अफ द म्याचको पुरस्कार लिएपछि मनीषराज पाण्डे ।

पादाङमा सेप्टेम्बर ७ मा भएको खेलमा पहिला ब्याटिङ गरेको जापानलाई नेपालले ३३ ओभरमा ७२ रनमै अलआउट गर्‍यो । एलबी क्षेत्रीले ६ ओभरमा ९ रन खर्चेर ३, वसन्त शाहीले ८ रन खर्चेर २ तथा मनीषराज पाण्डेले १ विकेट लिए ।

नेपालले १५ ओभरमै लक्ष्य पुरा गरेको थियो । नेपालको अन्तर्राष्ट्रिय क्रिकेटमा पहिलो विजय थियो । मनीषराज पाण्डेले २७ र सञ्जय गुरुङले २० रन बनाएका थिए । अलराउन्ड प्रदर्शन गर्दै मनीष प्लेयर अफ द म्याचमा चुनिए । नेपाली क्रिकेट खेलाडीले अन्तर्राष्ट्रिय क्रिकेटमा पाएको यो पहिलो प्लेयर अफ द म्याच अवार्ड पनि थियो ।

वर्षाको निराशा

१९९८, ललितपुर

नेपालले १९९८ मा सीमित भौतिक पूर्वाधारमा दोस्रो एसीसी ट्रफी आयोजना गर्ने ठुलो साहस गरेको थियो । जसका लागि नव निर्मित त्रिवि क्रिकेट मैदान कीर्तिपुर, सेन्ट जेभियर्स स्कुल जावलाखेल तथा पुल्चोक इन्जिनियरिङ क्याम्पसका दुई मैदानमा प्रतियोगिताका खेलहरू आयोजना भएका थिए ।

तर पुल्चोक क्याम्पसको दोस्रो मैदानमा नेपाल र जापान बीचको खेल वर्षाका कारण टस पनि हुन नपाई रद्द भएको थियो । प्रतियोगितामा यो नेपालको पहिलो खेल थियो । नेपाल अझ थप निराश त्यत्ति बेला भयो, जति खेर नेपालले आफ्नो दोस्रो खेल कीर्तिपुरमा थाइल्यान्डसँग पनि वर्षा कारण रद्द भएको हेर्न बाध्य भयो । यसले नेपालको सेमिफाइनलमा पुग्ने आशालाई समाप्त पारिसकेको थियो । अन्तिम दुई खेलमा यूएई र हङकङसँग पराजित भएपछि नेपाल घरेलु मैदानमा आयोजना गरेको प्रतियोगितामा जितविहीन हुन पुग्यो ।

जापानको बेसबल ग्रिप 

२०००, यूएई

एसीसी ट्रफीको तेस्रो संस्करणमा नेपाल र जापान लगातार तेस्रो पटक भिडिरहेका थिए । पहिलो खेलमा यूएईसँग १ विकेटको झिनो हार बेहोरेको नेपालले दोस्रो खेलमा जापानको सामना गरिरहेको थियो र पहिलो पटक एसीसी ट्रफीको सेमिफाइनलमा पुग्न नेपाललाई यो खेल जित्न निकै महत्त्वपूर्ण थियो ।

जापानले लगभग पुरा ५० ओभर ब्याटिङ गरिदियो । ४९.५ ओभर खेल्दै जापान १ सय ३३ रनमा अलआउट भयो । हिरोकाजु ताकाहासीले २८ रन बनाए । नेपालबाट विनोद दासले ९ ओभरमा २४ रन खर्चेर ३, कप्तान पवन अग्रवालले १७ रन खर्चेर २ र महबुब आलमले २३ रन खर्चेर २ विकेट लिए । किरण अग्रवालले ६३ बलमा अविजित ५३ रन बनाएपछि नेपालले २०.३ ओभरमै ३ विकेट गुमाई लक्ष्य पुरा गर्‍यो । सञ्जीव जोशीले १६ र कप्तान राजु खड्काले अविजित ४४ रन बनाई नेपाललाई जिताए ।