सोलुखुम्बु — सोलुखुम्बुको माप्य दुधकोशी गाउँपालिकामा आयोजित जिल्लाव्यापी खुला ५ ए फुटसल प्रतियोगिताको उपाधि न्यु रेन्टल सर्भिसले जितेको छ । गत २२ असोजबाट ३ दिनसम्म सञ्चालन भएको फुटसल प्रतियोगितामा सहभागी १४ वटा टिमलाई हराउँदै रेन्टल सर्भिसले उपाधि जितेको आयोजकले जनाएको छ ।

खास्ताव फुटसल संघको आयोजनामा सञ्चालन भएको प्रतियोगिताको दोस्रो स्थान बासा फुटबल क्लबले हासिल गरेको छ । प्रतियोगितामा विजेता र उपविजेतासहित उत्कृष्ट खेल प्रदर्शन गर्ने विधागत खेलाडीहरूलाई गाउँपालिका अध्यक्ष बुद्धिकिरण राईले पुरस्कार हस्तान्तरण गरेका छन् । प्रतियोगितामा टप स्कोररको पुरस्कार विजेता बासा फुटसल क्लबका खेलाडी खेम राई बनेका छन् । 

यस्तै टक्सीन्दु फुटसल क्लबका खेलाडी निखिल बिक उत्कृष्ट गोलरक्षक बनेका छन् भने उपाधि विजेता टिम न्यु रेन्टलका खेलाडी सन्दिप मगर उत्कृष्ट खेलाडी बनेका छन् । प्रतियोगितामा उपाधि विजेता टिम न्यु रेन्टलले नगद ५० हजार र उपविजेता बासा फुटसल क्लबले २५ हजार नगदको साथमा ट्रफी मेडल र प्रमाणपत्रबाट पुरस्कृत गरिएको खेल संयोजक सुजन राईले बताए ।