काठमाडौँ — एसिया कप फुटबल २०२७ छनोटको तेस्रो चरणको समूह ‘एफ’ मा नेपाल चार टिममध्ये अन्तिम स्थानमा छ । अहिलेसम्म खेलेका दुवै खेलमा नेपाल पराजित छ । त्यसको अर्थ नेपाल अंकविहीन छ । जित्नैपर्ने लाओसविरुद्धको खेलमा पनि नेपाल पराजित भयो । तर, स्थिति अप्रत्यासित रूपमा के तयार भएको छ भने नेपालले आफ्नो अनुकूल बनाउन सक्छ । यो समूहका अरू दुई टिम मलेसिया र भियतनाम छन् । 

मलेसिया दुई खेल जितेर ६ अंकसहित शीर्षमा छ भने त्यसपछि भियतनाम ३ अंक लिएर दोस्रो स्थानमा छ । त्यसपछि लाओसको पनि ३ अंक नै छ । पछिल्लो समय नेपाली फुटबललाई कोही एक प्रतिद्वन्द्वीसँगको हारले पिरोलेको छ भने त्यो लाओसविरुद्ध नै हो । नेपालले मलेसियाविरुद्धको पहिलो खेल २–० ले गुमाएको थियो । त्यसपछि लाओससँग २–१ ले स्तब्ध भयो । लाओस त्यस्तो टिम थियो, जोसँग नेपाल यसअघि पराजित भएकै थिएन । 

अबको नयाँ स्थिति केभन्दा मलेसियालाई एसियाली फुटबल महासंघ (एएफसी) ले कारबाही गर्दै छ, अयोग्य खेलाडी खेलाएको आरोपमा । मलेसिया साँच्चै कारबाहीमा पर्‍यो भने नेपाललाई त्यस खेलबाट उल्टै ३ अंक प्राप्त हुनसक्छ । यस्तोमा नेपालसामु उत्साही हुने र अबका खेलमा राम्रो प्रदर्शन गर्ने आधार तयार हुनसक्छ । यही पृष्ठभूमिमा नेपाली राष्ट्रिय फुटबल टिमले भियतनामको सामना गर्दै छ र त्यसका लागि मंगलबार होचिमिन सिटीतर्फ जाँदै छ । 

नेपालले त्यहाँ दुई खेल खेल्नेछ, गो टाउ स्टेडियममा । पहिलो खेल हुनेछ बिहीबार । यो हुनेछ भियतनामको आफ्नो घरको खेल । त्यसपछि यिनै दुई टिम असोज २८ गते दोस्रो पटक भिड्नेछन् । यो भने नेपालको घरको खेल हुनेछ । दशरथ रंगशाला फिफा र एएफसीको खेलका लागि उपयुक्त नरहेको हुनाले नेपालले घरेलु मैदानमा खेल्ने अवसर गुमाएको हो । यो तथ्यले पनि नेपाली टिम निराश छ, किनभने टोलीले घरमा खेल्नुको फाइदा गुमाइरहेको छ । 

बलियो भियतनाम

पछिल्लो समय एसियाली फुटबलमा कुनै एक टिम राम्रो प्रगति गरेको छ भने त्यो भियतनाम पनि हो । सन् साठीको दशकमा भियतनामी फुटबल असाध्यै बलियो थियो । पछि केही ओरालो लाग्यो । सन् २००० यता भियतनामी फुटबल फेरि ब्युँझिने प्रयासमा छ । यसक्रममा भियतनाम दुईपल्ट एसिया कपमा पनि छनोट भइसकेको छ । दक्षिण पूर्वी देशमध्ये भियतनामी फुटबल माथिल्लो दर्जाको मानिन्छ । यसैले त भियतनाम आसियान च्याम्पियनसिप २०२४ को विजेता पनि हो ।

दक्षिण पूर्वी देशहरू सबैभन्दा ठूलो यो प्रतियोगिता भियतनामले तीनपल्ट जितेको छ । नेपालले भने भियतनाम नियमित खेल्न पाइरहने प्रतिद्वन्द्वी भने होइन । नेपाल र भियतनामबीच अहिलेसम्म दुई खेल भएको छ । यी दुवै खेल सन् २००३ को एसिया कप छनोटको दोस्रो चरणमा भएको थियो । त्यसमध्ये दक्षिण कोरियाको इन्चोनमा भएको पहिलो लेगमा नेपाल ५–० ले पराजित रहेको थियो । त्यसपछि ओमानको मस्कटमा भएको दोस्रो लेगमा नेपाल २–० ले हारेको थियो । 

यस्तोमा नेपाल २२ वर्षपछि पहिलो पटक भियतनामको सामना गर्दै छ । नेपालका लागि त्यो एसिया कप छनोट सर्वथा बिर्सनलायक रहेको थियो । दक्षिण कोरिया र ओमान दुवै देशमा नेपालको प्रदर्शन निकै खराब थियो । नेपालले एकपछि अर्को फराकिलो गोलअन्तरको हार बेहोरेको थियो । नेपाली फुटबल इतिहासमा एसिया कप छनोटको यो दोस्रो चरण अहिलेसम्मकै सबैभन्दा खराब नतिजामध्ये एक रहेको छ । त्यसैले नेपालका लागि अहिले भियतनामको सामना गर्दा पुरानो इतिहास बिर्सेर खेलेकै राम्रो हुनेछ ।

फरक तयारी

नेपाली राष्ट्रिय टिमका मुख्य प्रशिक्षक म्याट रस भियतनामविरुद्धको खेललाई लिएर उत्साहित छन् । उनी यसका लागि भएको अहिलेसम्मको तयारीलाई फरक मान्छन् । एन्फाले सोमबार आयोजित प्रेस मिटमा प्रशिक्षक रसले भने, ‘यसपल्टको तयारी साँच्चै फरक रह्यो, किनभने अहिले हाम्रा अधिकांस खेलाडी बंगलादेश, माल्दिभ्स र कम्बोडियामा व्यावसायिक फुटबल खेलिरहेका छन् । त्यसैले किरण लिम्बू र लाकेन लिम्बू सिधै भितयनाम आउने छन् ।’

उनले थपे, ‘त्यसैले सुरुमा हामीले केही नयाँ खेलाडीलाई जाँचेका थियौं, तर अन्त्यमा पुरानै खेलाडीमाथि विश्वास गर्‍यौं । यसपल्टको तयारी यसै कारण फरक रह्यो । अहिलेको स्थितिलाई लिएर हामी उत्साही किन पनि छौं भन्दा मलेसियाविरुद्धको खेलको नतिजा उल्टिने छ । विश्वास गरौं, हामीलाई ३ अंक आउने छ । यस्तो भयो भने हामी पनि छनोटको दाबेदार हुन्छौं । त्यसैले भियतनामविरुद्धका दुई खेल निकै महत्त्वपूर्ण हुनेछ ।’ 

‘हामी आत्मविश्वासी पनि छौं, किनभने हामीले राम्रो तयारी गरेका छौं । भियतनामविरुद्ध हामीले आफ्नो खेल शैली र रणनीतिमा खासै परिवर्तन गर्ने छैनौं । अहिले हाम्रा खेलाडी टिम योजनासँग अभ्यस्त भइसकेका छन् । प्रशिक्षकका रूपमा म बंगलादेशविरुद्धको मैत्रीपूर्ण खेलमा हाम्रा खेलाडीको प्रदर्शनमा खुसी थिएँ । यही लयलाई हामी भियतनामविरुद्ध पनि कायम राख्न चाहन्छौं । भियतनामविरुद्ध हामी केही आक्रमण भएर खेल्नछौं,’ प्रशिक्षक रसले भने । 

अस्ट्रेलियाली प्रशिक्षक रसको दाबी थियो, ‘भियतनामविरुद्ध अंक जोड्नेमा हामी विश्वास गरिरहेका छौं । हाम्रा सबै खेलाडी फिट छन् । हाम्रा सबै खेलाडी शारीरिक र मानसिक दुवै रूपमा बलिया छन् । पछिल्लो केही साता हामीले राम्रो तयारी पनि गरेका छौं । पछिल्लो समय नेपाल धेरै उतारचढावबाट गुज्रेको छ । हामी फुटबलको माध्यमबाट सकारात्मक सन्देश दिन चाहन्छौं । नेपाली क्रिकेटले पछिल्लो पटक राम्रो गरेको छ, अब नेपाली फुटबलको पालो ।’