लन्डन — एभरटनले एक गोलले पछाडि रहेको स्थिति उल्टाएर इंग्लिस प्रिमियर लिगमा आइतबार क्रिस्टल प्यालेसमाथि २–१ को सानदार जित निकालेको छ । प्यालेसले पहिलो हाफमा अग्रता लिएर पनि त्यसलाई जोगाउन सकेन । अन्ततः प्यालेसको १८ खेलको अपराजित यात्रा टुंगिएको छ । 

प्यालेसले ३७ औं मिनेटमा डानियल मुनोजको गोलमा ३८ औं मिनेटमा अग्रता लिएको थियो । टोली ७६ औं मिनेटसम्म जिततर्फ अग्रसर देखिएको थियो । तर त्यही बेला प्यालेसले एभरटनलाई पेनाल्टीको अवसर दियो । त्यसमा इलिमन एडियेले गोल गरेका थिए । दोस्रो हाफको खेल इन्ज्युरी समयमा प्रवेश गरेयता तेस्रो मिनेटमा ज्याक ग्रेलिसले विजयी गोल गरे र त्यो धेरै हदसम्म भाग्यले साथ दिएको गोल रह्यो ।

यो जितपछि एभरटनको ७ खेलबाट ११ अंक भएको छ । टोली सातौं स्थानमा उक्लेको छ । हारका बावजुत प्यालेस १२ अंकसहित पाँचौं स्थानमा रह्यो । प्यालेसले यो खेल जितेको भए दोस्रो स्थानमा उक्लिने थियो । ग्रेलिसले एभरटन आएयता गोल गरेको यो पहिलो पटक हो । ‘पहिलो गोलका लागि म खुसी छु । त्यो भन्दा टिमको जित महत्त्वपूर्ण हो ।’ 

न्युकासल युनाइटेडले भने सेन्ट जेम्स पार्कमा नटिङ्घम फरेस्टलाई २–० ले हरायो । टोलीको दुवै गोल दोस्रो हाफमा सम्भव भएको हो । ब्रुनो गुइमारेसले ५८ औं मिनेटमा गोलको खाता खोलेपछि निक वाल्टमेडले ८४ औं मिनेटमा पेनाल्टीबाट दोस्रो गोल थपेका थिए । यो जितपछि न्युकासलको ९ अंक भएको छ । टोली ११ औं स्थानमा उक्लेको छ ।

न्युकासलको यो लिगमा लगातार दोस्रो जित हो । फरेस्ट भने ५ अंकमै सीमित छ । टिम रेलिगेसन क्षेत्रबाट ठीक माथि १७ औं स्थानमा छ । हारले फरेस्टका नयाँ प्रशिक्षक एन्गे पोस्टेकोग्लु दबाब आएका छन् । क्लब सम्हालेयता उनी पहिलो जितका लागि संघर्षरत छन् । खेलपछि उनले भने, ‘हामीले दोस्रो हाफमा आफ्नो खेलको गति बढाएका थियौं । तर निर्णायक मोडका लागि सफल रहेनौं । हामीले मौका त सिर्जना गर्न सक्यौं, तर त्यसबाट फाइदा लिन सकेनौं ।’