काठमाडौंमा हुँदै आएको पल्सर स्पोर्ट्स अवार्ड यस वर्ष पहिलो पटक पोखरामा आयोजना हुने, अतिथिहरूको आवास पोखरा लेकसाइडको मझेरीमा हुनेछ।
काठमाडौँ — नेपाल खेलकुद पत्रकार मञ्चले एनएसजेएफ पल्सर स्पोर्ट्स अवार्डको २२औं संस्करणका लागि अफिसियल होटल पार्टनरमा मझेरी रिसोर्ट तथा स्पासँग प्रायोजन सम्झौता गरेको छ ।
पल्सर स्पोर्ट्स अवार्ड भदौ २९ गते पर्यटनको राजधानी पोखरामा हुनेछ । काठमाडौंमा हुँदै आएको यस अवार्ड कार्यक्रम पहिलो पटक उपत्यका बाहिर हुन लागेको हो ।
त्यसैले अवार्ड कार्यक्रममा उपस्थित अतिथिहरूको आवासको प्रबन्ध गर्न पोखरा लेकसाइडमा रहेको मझेरीसँग सम्झौता भएको छ । सम्झौता पत्रमा नेपाल खेलकुद पत्रकार मञ्चका अध्यक्ष निरञ्जन अधिकारी र होटल मझेरी रिसोर्टका अध्यक्ष अर्जुन खनालले हस्ताक्षर गरेका छन् ।
