बागमतीले स्मृति पोखरेलको १६ स्कोरमा नेमोनिकमाथि ३७–२५ को जित हासिल गर्दै उपाधि जित्न सफल भएको छ।
काठमाडौँ — एन्जल लर्ड एकेडेमी र बागमती बोर्डिङले दोस्रो टाइमलाइन अन्तरविद्यालय बास्केटबल प्रतियोगिताको उपाधि जितेका छन् ।आयोजक टाइमलाइन स्कुलको कोर्टमा सोमबार ब्वाइजतर्फ फाइनलमा एन्जल लर्डले नेमोनिक मोर्डन एकेडेमीलाई ४९–४२ स्कोरले हरायो । एन्जलका अभय गुरुङले २२ स्कोर गरे ।
गर्ल्सको उपाधि भिडन्तमा स्मृति पोखरेलको १६ स्कोरमा बागमतीले नेमोनिकलाई ३७–२५ ले हरायो ।
ब्वाइजमा एन्जल लर्डका समीर मगर र गर्ल्समा बागमतीकी स्मृति पोखरेल मोस्ट भ्यालुएबल प्लेयर घोषित भए । ब्वाइजमा नेमोनिकका विपेश थिङ र गर्ल्समा नेमोनिककी वर्षा खड्का उत्कृष्ट थ्री प्वाइन्टर चुनिए । ब्वाइजमा रेनिस लामा र गर्ल्समा अस्मिता थापा सर्वाधिक स्कोरकर्ता बने । दुवै नेमोनिकका हुन् ।
ब्वाइजमा मार्वलस र गर्ल्समा काठमाडौं जेभियर्स पब्लिक स्कुल अनुशासित टिम ठहरिए । ब्वाइजमा आकाश दीप र गर्ल्समा विन्सम इमर्जिङ टिम चुनिए ।
विजेतालाई गोकर्णेश्वर नगरपालिका मेयर दीपककुमार रिसाल, आयोजक टाइमलाइनका प्रिन्सिपल रामप्रसाद बडाललगायतले पुरस्कृत गरे । भदौ ५ देखि सुरु प्रतियोगिताको ब्वाइजमा २४ र गर्ल्समा १६ टिमले प्रतिस्पर्धा गरेको संयोजक राजेन्द्र लम्सालले जनाए ।
