काठमाडौँ — लगातारको खराब प्रदर्शनपछि नेपालको साफ यू–१७ महिला च्याम्पियनसिप जित्ने सम्भावना बुधबार समाप्त भएको छ । भुटानको थिम्पुस्थित चाङलिमिथाङ रंगशालामा भएको दोस्रो लेगको पहिलो खेलमा नेपाली टिम बंगलादेशसँग ४–१ ले पराजित भएको हो । 

यसअघि पहिलो लेगमा पनि नेपाल बंगलादेशसँग ३–० ले पराजित भएको थियो । बंगलादेश तेस्रो जितसँगै ९ अंकसहित समूहको दोस्रो स्थानमा रह्यो । नेपालको भने ४ खेलपछि ३ अंकमात्र रहेको छ । नेपाल तीन खेलमा पराजित भइसकेको छ । यो हारपछि नेपालको उपाधिमाथि चुनौती सकिएको हो । 

बंगलादेशको जितमा सौरभी प्रीतिले ह्याट्रिक गरिन् । सौरभीले थुनुय मार्माको गोलबाट ३८ औं मिनेटमा अग्रता लिएको थियो । त्यसपछि शौरभीले ४४, ७१ र ८६ औं मिनेटमा गोल गरिन् । नेपालबाट सम्भव भएको एकमात्र गोल कप्तान भूमिका बुढाथोकीको नाममा रह्यो । उनले पहिलो हाफको इन्ज्युरी समयमा गोल गरेकी थिइन् । 

यसपल्टको प्रतियोगितामा कुल ४ टिमको सहभागिता रहेको छ । ती टिमले डबल राउन्ड रोबिनको आधारमा खेलिरहेको छ । भारत ४ खेलबाट १२ अंकमा शीर्षस्थानमा छ । भारतले दिनको दोस्रो खेलमा आयोजक भुटानलाई ५–० ले हरायो । प्रतियोगिताको बाँकी खेलमा जस्तो नतिजा आए पनि नेपालले अब भारतलाई उछिन्न सक्ने छैन ।