भैरहवा — वात्सल्य एभरेस्ट वुमन्स भलिबल लिगअन्तर्गत लुम्बिनी लाभाज टिमले सोमबार रुपन्देहीको भैरहवामा ट्रफी सार्वजनिक गरेको छ । उक्त कार्यक्रममा भदौ २० देखि २८ गतेसम्म पोखरामा सञ्चालन हुने लिगमा लुम्बिनीबाट सहभागी हुने खेलाडीबारे पनि जानकारी गराइएको छ ।

लुम्बिनी लाभाजका प्रमुख प्रशिक्षक भरत यादवले सोमबार बिहान आयोजित ट्यालेन्ट हन्टबाट रुपन्देहीकी जानकी केसीलाई छनौट गरिएको जानकारी दिए । सीप, खेल कौशल र उमेर समूह मेल खाँदा केसीलाई छनौट गरिएको जनाए । केसीलाई ५० हजार रुपैयाँमा टिममा आवद्ध गरिएको हो । नेपाल भलिबल संघले खेललाई उचाइ प्रदान गर्न दोस्रो चरणको लिग हुन गइरहेको जनाए । टिममा ९ जना नेपाली र तीन जना विदेशी खेलाडी रहेका जानकारी दिए ।

लुम्बिनी लाभाजकी मार्की खेलाडी अरुणा शाहीले उपाधि जित्नेगरी खेलाडी छनौट गरिएको जानकारी दिइन् । अहिले ट्यालेन्ट हन्टबाट छनौट हुन असफल खेलाडीलाई आगामी दिनमा अवसर प्रदान गरिने बताइन् । 'त्यस अनुसार मेहनत गर्नु होला,' उनले भनिन्, 'आज अनावरण गरिएको ट्रफी लुम्बिनीमा ल्याउने गरी खेल्नेछौँ ।' लुम्बिनी लाभाजसित जोडिन पाउँदा हर्षित रहेको टिम कप्तान रहेकी शाहीले बताइन् ।

टिमकी ब्रान्ड एम्बेसडर आना शर्माले महिलाका लागि प्रदान गरिने यस्ता अवसरले खुसी तुल्याउने बताइन् । अहिले खेलाडीमाथि लगानी गर्नु भनेको भविष्यमा लगानी गर्नु भएको उनले बताइन् । आफूले महिला टिमलाई समर्थन गर्न पाएकोमा खुसी व्यक्त गरिन् ।

टिमका निर्देशक रामजी पौडेलले गत वर्षदेखि सुरु भएको लिगमा लुम्बिनी लाभाजले पहिलोपटक सहभागिता जनाउन लागेको बताए । मुलुकका सबै स्थानमा खेल्न सकिने भलिबल खेललाई लुम्बिनी लाभाजले थप उचाइमा पुर्‍याउने जानकारी दिए । 'महिला भलिबल टिमलाई तपाईंहरूले गर्ने प्रोत्साहनले ट्रफी भित्र्याउन भूमिका खेल्नेछ,' उनले भने, 'अहिले नेपाली महिला टिमले उचाइ हासिल गरेको छ । त्यसलाई लुम्बिनीले थप उचाइमा पुर्‍याउने विश्वास गरेको छु ।'