काठमाडौँ — मधेश युनाइटेडले वात्सल्य एभरेस्ट महिला भलिबल लिगका लागि नेदरल्यान्ड्सकी डानिक आर्डेमालाई अनुबन्ध गरेको छ । मधेशले दोस्रो विदेशी खेलाडीको रूपमा उनलाई अनुबन्ध गरेको हो ।

यसअघि नेदरल्यान्ड्सकी आउट साइड हिटर रोमी भिनस्ट्रा मधेशसँग जोडिएकी थिइन् । १७५ सेमि अग्लो कदकी आर्डेमा अनुभवी सेटर हुन् । उनले नेदरल्यान्ड्सको शीर्ष क्लबहरूमा खेल्दै आएकी छन् ।

उनले नेदरल्यान्ड्स, स्पेन र जर्मनीका क्लबहरूमा खेलेर अनुभव बटुलेकी छन् । आर्डेमाले नेपाली महिला भलिबल लिगको हिस्सा हुन र मधेश युनाइटेडमा आबद्ध हुनु आफ्ना लागि गौरवको विषय भएको बताएकी छन् ।

मधेश युनाइटेडको मार्की खेलाडी निरुता ठगुन्ना र ब्रान्ड एम्बासडरमा अभिनेत्री नीति शाह छन् । पोखरामा भदौ २० देखि २८ सम्म हुने लिगमा मधेश टोलीको प्रशिक्षण बागडोर कोपिला उप्रेतीले सम्हालेकी छन् । टोलीले अक्सनबाट खेलाडीमा आरती सुवेदी, कोपिला राना, सरस्वती कट्टेल, उषा विष्ट, बबिता बोहरा, बसन्ती साउद र स्नेहा ठगुन्नालाई लिएको छ ।