‘फेरि ललितपुर क्विन्ससँग जोडिन पाउँदा निकै खुसी छु,’ आयशाले भनिन्, ‘यो मेरा लागि सम्मान पनि हो ।’
काठमाडौँ — एभरेस्ट महिला भलिबल लिग टोली ललितपुर क्विन्सले तेक्वान्दोकी आयशा शाक्यलाई आफ्नो गुडविल एम्बासडर निरन्तरता दिएको छ । दोस्रो संस्करणको एभरेस्ट महिला भलिबल लिग भदौ २० देखि २८ सम्म पोखरामा हुनेछ ।
सोमबार ललितपुर क्विन्स क्लबका अध्यक्ष रमेश पराजुली र सागकी तीन स्वर्ण पदक विजेता आयशा शाक्यले सम्झौता–पत्रमा हस्ताक्षर गरे ।
ललितपुर क्विन्ससँग सम्झौता नवीकरण गर्न पाउँदा आफू खुसी भएको आयशाले बताइन् । ‘फेरि ललितपुर क्विन्ससँग जोडिन पाउँदा निकै खुसी छु,’ आयशाले भनिन्, ‘यो मेरा लागि सम्मान पनि हो ।’ यो संस्करण ललितपुरले उपाधि जित्नेमा आफू आशावादी रहेको आयशा बताउँछिन् । गत वर्ष ललितपुर उपविजेता बनेको थियो ।
उत्सव खड्काको प्रशिक्षणमा ललितपुर क्विन्स कोर्टमा उत्रनेछ । मार्की खेलाडी तथा कप्तान सलिना श्रेष्ठ रहेकी छन् भने ललितपुरले अक्सनबाट संगम महतो, लक्ष्मी चन्द, सुनीता राई, सलिना बुढा मगर, निशा चौधरी, सृष्टि खड्गी र भावना डाँगीलाई लिएको छ । विदेशी खेलाडीमा क्विन्सले थाइ खेलाडी पट्राथिप सान्त्रकुनलाई पुनः अनुबन्ध गरेको छ । उनले क्विन्सलाई उपविजेता बनाउन मुख्य भूमिका खेलेकी थिइन् ।
