पर्सा — वात्सल्य एभरेस्ट महिला भलिबल लिगको दोस्रो संस्करणको ट्रफी शुक्रबार वीरगन्जमा अनावरण गरिएको छ । प्रतियोगिता भदौ २० देखि २८ सम्म पोखरामा हुनेछ । 

वीरगन्ज महानगरपालिकाका मेयर राजेशमान सिंह र मधेश युनाइटेडकी ब्रान्ड एम्बासडर तथा पूर्वमिस नेपाल इन्टरनेसनल नीति शाहले संयुक्त रूपमा ट्रफी अनावरण गरे । मेयर सिंहले मधेश युनाइटेडको नयाँ जर्सी पनि सार्वजनिक गरे । जर्सी मार्की खेलाडी निरुता ठगुन्नालाई हस्तान्तरण गरिएको थियो । 

मेयर सिंहले भलिबल खेलको विकास र महिला सशक्तीकरणमा लिगले महत्वपूर्ण भूमिका खेल्ने विश्वास व्यक्त गरे । उनले खेल मनोरञ्जनका लागि मात्र नभई यसले पहिचान, आत्मनिर्भरता र सामाजिक परिवर्तन ल्याउने बताए । वीरगन्ज महानगर भलिबल 

खेलको प्रवर्द्धनमा पूर्ण प्रतिबद्ध रहेको पनि उनले प्रतिवद्धता जनाए । मधेश विश्वविद्यालयका उपकुलपति डा. दीपक शाक्यले भलिबल खेललाई मधेशमा थप विस्तार गर्न सुझाए । वीरगन्ज उद्योग वाणिज्य 

संघका अध्यक्ष हरिप्रसाद गौतमले यस्ता प्रतियोगिताले युवालाई सकारात्मक बाटो देखाउने र सहरको प्रतिष्ठा बढाउने बताए । 

मधेश स्पोर्ट्स प्रालिको स्वामित्व रहेको मधेश युनाइटेडका सञ्चालक विशाल अग्रवालले संस्थाको स्थापना र उद्देश्यबारे प्रकाश पारेका थिए । मधेश युनाइटेडकी प्रमुख खुशी सिवाकोटीले टिमको विगत, सिकाइ र आगामी योजनाबारे प्रस्तुति दिँदै सुधार र प्रतिबद्धतासहित कोर्टमा फर्किन लागेको बताइन् ।