काठमाडौँ — नेपाली टेबलटेनिसकै सर्वाधिक पुरस्कार राशिको स्ट्याग ग्लोबल च्याम्पियन्स लिग सिजन थ्री भदौको पहिलो साता हुने भएको छ ।

विदेशी खेलाडीलाई अनुबन्ध गरी नेपाली क्लबहरूले स्ट्याग ग्लोबल च्याम्पियन्स लिगमा प्रतिस्पर्धा गर्दै आएका छन् । अखिल नेपाल टेबलटेनिस संघको तत्वावधान र स्ट्याग च्याम्पियन्स टेबलटेनिस एकेडेमीको आयोजनामा चार राष्ट्रका विदेशी खेलाडी सहभागी हुने च्याम्पियन्स लिगको तेस्रो सिजन हुन लागेको हो ।

एकेडेमीको आयोजनामा तीन वर्षयता यो प्रतियोगिता हुँदै आएको छ । एकेडेमी नवौं पटककी नेपाल च्याम्पियन नविता श्रेष्ठले सञ्चालन गर्दै आएकी छन् । घरेलु टेबलटेनिसमा उत्कृष्ट प्रतियोगिताको रूपमा च्याम्पियन्स लिग हुँदै आएको छ ।

भदौ १ देखि ६ सम्म लैनचौरस्थित राष्ट्रिय टेबलटेनिस प्रशिक्षण केन्द्रमा हुने प्रतियोगितामा बुधबार पत्रकार सम्मेलनमा जनाइएअनुसार यल टेबलटेनिस, होप्स टेबलटेनिस एकेडेमी, एभीएम टेबलटेनिस क्लब, द ड्रागन क्लब, कीर्तिपुर नगरपालिका, भोर्टेक्स नेपाल, ओल्ड हाउस रेस्ट्रो, टप स्पिन टेबलटेनिस गुड्स नेपाल, खोल्चा पुखु खेलकुद समिति गरी कुल १० क्लबले प्रतिस्पर्धा गर्नेछन् । पछिल्लो संस्करणमा ८ टोलीले प्रतिस्पर्धा गरे पनि यसपल्ट टोलीको सहभागिता बढाइएको छ । एकेडेमीकी प्रबन्ध निर्देशक नविता श्रेष्ठले डिजिटल लाइटका साथै खेलस्थल आकर्षक बनाएर प्रतियोगिता गरिने बताइन् ।