काठमाडौँ — नेपाली महिला राष्ट्रिय फुटबल टोलीकी कप्तान सावित्रा भण्डारी ‘साम्बा’ म्याक्सीम्याक्स एजुकेसन एन्ड माइग्रेसन सर्भिसको ब्रान्ड एम्बासडर बनेकी छन् । राष्ट्रिय टोलीबाट ६० खेलमा ६६ गोल गरिसकेकी साम्बालाई म्याक्सीम्याक्सले ३ वर्षका लागि अनुबन्धित गरेको हो ।

मंगलबार आयोजित कार्यक्रममा दुई पक्षबीच सम्झौता भएको छ । सम्झौताको आर्थिक पक्ष खुलाइएको छैन । म्याक्सीम्याक्सका प्रबन्ध निर्देशक रोजनप्रसाद दनै र सावित्राले सम्झौतापत्रमा हस्ताक्षर गरेका छन् । प्रबन्ध निर्देशक दनैले दुवै पक्षको हितका लागि सम्झौता भएको जनाएका छन् ।

‘युवाका लागि सावित्रा प्रेरणादायी व्यक्तित्व हुन्, कठिन मिहिनेत र समपर्णले गर्दा यो स्थितिमा पुगिन्छ भन्ने उदाहरण दिएकी छन्,’ दनैले भने, ‘हामी पनि युवालक्षित कार्यक्रम गर्दै आएकाले साम्बालाई रोजेका हौं । उनीसँग सहकार्य गर्न पाउँदा हामी निकै उत्साही छौं ।’

म्याक्सीम्याक्ससँगको सम्बन्धले नयाँ पुस्ताका लागि बाटो खुल्ने सावित्रालाई बताइन् । ‘५–७ वर्ष अगाडिसम्म बाटोमा हिँड्दा क्रिकेट खेलाडीको मात्र होडिङ देख्थें, मलाई पनि यस्तै होडिङ बोर्डमा देखिन मन थियो,’ सावित्राले भनिन्, ‘यो होडिङ बोर्डमा देखिन के गर्नुपर्छ भन्ने पत्ता लगाएर म अझ मिहिनेत गर्दै आज यो स्थितिमा आइपुगेको छु । म युवा खेलाडीलाई प्रेरित गर्ने हेतुले खेलिरहेको छु । यो सम्झौता मेरो नयाँ यात्राको सुरुआत हो ।’

सन् २०१४ को नोभेम्बर १२ मा १८ वर्षको उमेरमा सावित्राले पाकिस्तानको इस्लामाबादमा भुटानविरुद्ध खेल्दै राष्ट्रिय टोलीबाट ‘डेब्यु’ गरिरहेकी थिइन् । उनले एपीएफ क्लब हुँदै इन्डियन वुमेन्स लिगमा सेथु एफसी र गोकुलम केरलाबाट खेलिसकेकी छन् । २०२२–२३ मा गोकुलमलाई इन्डियन वुमेन्स लिगको उपाधि दिलाउँदा १० खेलमा ३१ गोल गरेकी थिइन् । त्यसबाहेक उनले इजरायलको होपोइल रानाना र गत वर्ष फ्रान्सको प्रिमियर लिगमा ग्वेन्गाम्पबाट खेलेकी थिइन् । अव छिटै नै अस्ट्रेलियाको प्रिमियर लिगमा न्युजिल्यान्डको वेलिङ्टन फोनिक्सबाट खेल्दै छिन् ।