काठमाडौँ — नेपाल अर्को वर्ष थाइल्यान्डमा हुने यू–२० वुमेन्स एसियन कपमा छनोट हुन असफल रह्यो । त्यति मात्र होइन, छनोटको अन्तिम खेलमा नेपाल आइतबार उत्तर कोरियाको हातबाट निराशाजनक रूपमा ११–० ले पराजित रह्यो र पीडादायी एकोहोरो नतिजासँग प्रतियोगिता टुंग्याउन बाध्य रह्यो । 

हारपछि नेपाल चार अंकसहित समूहको दोस्रो स्थानमा रह्यो । तर यो दोस्रो स्थानमा रहने उत्कृष्ट तीन टिममा पर्न पर्याप्त रहेन । छनोटमा कुल आठ समूह रहेकामा दोस्रो स्थानमा रहने टिममध्ये नेपाल सबैभन्दा पुछारमा रह्यो । उत्तर कोरिया भने तीन खेलबाट अधिकतम ९ अंकसहित समूह विजेता रह्यो र छनोट हुन सफल रह्यो । 

आइतबारकै अर्को खेलमा साउदी अरेबियाले भुटानमाथि २–१ को जित निकाल्यो र समूहको तेस्रो स्थानमा रहन सफल रह्यो । उसको तीन अंक भएको छ । आयोजक भुटान पनि निराशाजनक रूपमा अन्तिम स्थानमा रह्यो । उसले एकै अंक मात्र बटुल्न सक्यो । 

थिम्पुको चाङलिमिथाङ रंगशालामा भएको खेलमा यो समूहको तीनपल्टको विश्व र दुईपल्टको एसियाली च्याम्पियन उत्तर कोरियाले पहिलो हाफमा पाँच गोल गरेको थियो । पूरा अवधिमा आक्रामक रहेको उत्तर कोरियाका लागि हो क्योङले पाँच गोल गरिन् । यस्तै चोए चो–गमले पनि तीन गोल गरिन् ।

उत्तर कोरियाले ८८ मिनेटयता इन्ज्युरी समयमा चार गोल गरेको थियो । उत्तर कोरियाले यसअघि साउदी अरेबियालाई १५–० र भुटानलाई १०–० ले हराएको थियो । यस क्रममा उत्तर कोरियाले तीन खेलमा कुल ३६ गोल गरेको हो ।